پاکستان اوردوسی باش قوماندانی باشلیغی عاصم منیر، بو مملکت‌نینگ افغانستان توپراغیگه اویوشتیرگن هوا هجوملرینی «تروریزمگه قرشی مقصدلی حرکتلر» دېب اته‌دی و «طالبلرنینگ خَیالاتگه بېریلگن رهبریتی» بو وضعیت اوچون مسوول اېکنینی ایتدی.
عاصم منیر بوگون (جمعه، ۱۰ -میزان) راولپیندیده پاکستان اوردوسی‌نینگ یوقاری مرتبه‌لی قوماندانلری بیلن اۉتکزیلگن ییغیلیشده نطق سۉزله‌دی.
او پاکستان‌نینگ افغانستان حدودیگه اویوشتیرگن هوا هجوملرینی «تروریزمگه قرشی مقصدلی حرکتلر» اېکنینی ایتدی.
پاکستان اوردوسی رهبریتی اوشبو ییغیلیشده افغانستان حدودیده‌گی سۉنگگی هجوملرنی «اۉزینی حمایه قیلیش حقوقی» همده «افغانستاندن کېلیب چیقه‌یاتگن تروریزمگه قرشی مقصدلی حرکتلر» دایره‌سیده بهاله‌دی.
عاصم منیر شونده‌ی دېدی: «هندستان نامیدن تروریزم فعالیتی اوچون شرایط یره‌تیب بېره‌یاتگن، خَیالاتگه بېریلگن طالبلر رهبریتی‌گینه اوشبو وضعیت عاقبتلری اوچون مسوولدیر.»
اونینگ قۉشیمچه قیلیشیچه، پاکستان اوردوسی اۉز عملیاتلرینی «استخبارات معلوماتلریگه اساسلنگن حالده» عملگه آشیره‌دی.
طالبلر ۲۰۲۱ییلده حاکمیتگه قَیته کېلگنیدن بېری پاکستان بو گروهنی پاکستان طالبان حرکتی (تی‌تی‌پی) و بلوچستان آزادلیک اوردوسیگه مېزبانلیک قیلیشده عیبلب کېله‌دی همده افغانستان حدودیده‌گی نشانلرنی اۉنلب مرته بامباردمان قیلگن.
گرچه طالبلر پاکستان حکومتی نینگ قوراللی مخالفلری بیلن همکارلیک قیله‌یاتگنینی رسماً رد اېتسه-ده، بو گروه منصبدارلری بیر نېچه بار پاکستان حدودینی اېگه‌للش حقیده گپیرگن.
اېنگ سۉنگگی حالتده، شو هفته طالبلرنینگ چېگره، قبیله‌لر و اېلتلر وزیری نورالله نوری بو گروه ایکّی کون ایچیده پیشاورگچه یېتیب باریشی و پاکستان حدودینی اېگه‌للشی ممکنلیگینی ایتدی.
خیبر پختونخوا ایالتی والیسی کریم کوندی طالبلر وزیری نینگ بو گپلرینی «احماقانه و پراواکتسیان» دېب اته‌دی.
شونینگدېک، بلوچستان ولایتی‌نینگ سابق اخبارات وزیری جان اچکزی طالبلر حتا کنر و نورستانده‌گی اۉز مخالفلرینی یېنگیشگه قادر اېمسلیگینی، پیشاورنی اېگه‌للش حقیده‌گی دعوا اېسه «بۉش تهدید و اساسسیز سفسطه» اېکنینی ایتدی.
