بلجیم‌نینگ مهاجرلر وزیری آنلین ون بوسویت بلجیم ده ۶۰ کیشی افغانستانلیک باش‌پناه ایزلاوچی بارلیگینی ایتدی. اولر نینگ اکثریتی قاتللیک و زۉرلشده عیبدار دېب تاپیلگن و حاضرده قماقده سقلنماقده. وزیر نینگ ایتیشیچه، اولر جزا مدتینی اۉته‌ب بۉلگه‌چ، مملکت کۉچه‌لریده اېرکین یوریب قالمسلیگی کېره‌ک.
آنلین ون بوسویت کېچه (جمعه، ۱ح-میزان) بلجیم پارلمانی‌نینگ یلپی مجلسیده بریوسسېل بوندن بویان مهاجرلرنینگ مملکتگه کیریشی و چیقریب یوباریلیشی مسأله‌سینی جدّي نظارت قیلیشینی ایتدی.
او دېدی: «حاضر بلجیم‌ده ناقانوني یشه‌یاتگن و چیقریب یوباریش شرطلریگه جواب بېره‌دیگن تخمیناً ۶۰ نفر افغانستانلیک اېرکک بار. اولر حاضر بلجیم قماقخانه‌لریده جزا مدتینی اۉته‌ماقده و مملکتیمیزده ناقانوني روشده بۉلیب توریبدی.»
بوسویت خانیم قۉشیمچه قیلدی: «مېن بو شخصلر جزا مدتینی توگه‌تگنیدن کېین هم بلجیم کۉچه‌لریده تشلب قۉییلیشینی و احتمال ینه آدملرگه عذاب-عقوبت یېتکزیشینی ایسته‌مه‌یمن. چونکه بونده‌ی حالت انساني اېمس.»
او ۶۰ نفر افغانستانلیک اېرکک نینگ جنایتلری حقیده گپیرر اېکن، اولر آره‌سیده «قاتللر و زۉرلاوچیلر» بارلیگینی ایتدی.
بلجیم مهاجرلر وزیری کاه‌لیتسیان حکومتده‌گی هم‌کسبلریدن مخصوص ترتیبلر و اَیریم شخصلرنی قانوني قبول قیلیش مسأله‌سی محاکمه قیلینگن هر بیر حالتده، اولرنی مملکتدن قَیتریش باره‌سیده هم تېگیشلی چاره‌لر کۉریلیشیگه ایشانچ حاصل قیلیشنی سۉردی.
او بو فکرلرنی پارلمانده غزه‌لیک ۱۳ نفر محصل اوچون استثنا قیلینیشی مسأله‌سیده حکومت نینگ همکارلیک قیلمه‌یاتگنی حقیده‌گی تنقیدلر کوچه‌یگن بیر پیتده بیلدیردی.
اَیریم اعضالر بلجیم حکومتیدن اوشبو مملکت یونیورسیتیلریدن قبول آلگن ۱۳ نفر غزه‌لیک محصل اوچون استثنا قیلیشنی و اولر نینگ بېلگییه دیپلوماتیک وکالت‌خانه‌سیگه شخصن باریشیسیز ویزه بېریشنی سۉره‌گن اېدی.
اما بلجیم مهاجرلر وزیری اگر مملکت استثنا قیله‌دیگن بۉلسه، اوّلا افغانستان‌ده تعلیم آلیش حقوقیدن بوتونله‌ی محروم قیلینگن، اۉقیش امکانیدن اَیریلگن قیزلر اوچون استثنا قیلینیشی کېره‌کلیگینی ایتدی.
اونینگ قۉشیمچه قیلیشیچه، بلجیم اۉز اهالیسیگه نسبتاً غزا بیلن اېنگ کتّه همکارلیکنی عملگه آشیرگن، اېنگ کۉپ بېمارنی دوالنیش اوچون آلیب کېلگن و حاضرده ۳۲۰ کیشی فوق العاده اېواکواتسیه رۉیخطیده توریبدی. اولر بلجیم نینگ دیپلوماتیک وکالت‌خانه‌لریدن بیریگه مراجعت قیلیشی کېره‌ک.
بوسویت نینگ ایتیشیچه، غزه‌لیک محصللرگه استثنا قیلیب، افغانستانلیک قیزلرگه بونده‌ی امکانیت بېرمسلیک، شونینگدېک، حتا کانسوللیککه باریشدن قۉرقه‌یاتگن سېنېگه‌للیک ۱۰۰ نفر گاماسېکسوال اېرکککه رد جوابی بېریش — «امپراطورلیکچه مناسبت»دیر.
