طالبلرنینگ ساغلیقنی سقلش وزیری نور جلال جلالی روسيه ساغلیقنی سقلش وزیری بیلن اوچره‌شووده طبي خدمتلر صفتینی آشیریش باره‌سیده روسيه‌‌نینگ همکارلیگینی سۉره‌گن.
طالبلرنینگ ساغلیقنی سقلش وزیرلیگی بوگون (شنبه، ۱۱ میزان) بیانات بېریب، جلالی نینگ روسيه ساغلیقنی سقلش وزیری میخایل آلبرتویچ موراشکو بیلن اوچره‌شگنی حقیده خبر بېردی. اونده ایتیلیشیچه، تامانلر دارو-درمانلر، واکسینلر و طبي جهازلر، طبیات خادملری قابلیتینی آشیریش همده ینگی تکنالوژي‌لرنی جاري اېتیش کبی ساحه‌لرده ساغلیقنی سقلش بۉییچه همکارلیکنی رواجلنتیریش مسأله‌لرینی محاکمه قیلگن.
طالبلر ساغلیقنی سقلش وزیرلیگی بیاناتیگه کۉره، نورجلال جلالی اوچره‌شووده افغانستان ساغلیقنی سقلش سکتوری نینگ احتیاجلری و اوستوار یۉنه‌لیشلری حقیده معلومات بېرگن همده روسيه‌دن طبي خدمتلر صفتینی آشیریش، طبیات خادملری گ‌نینگ کسبی قایلیتینی کوچه‌یتیریش و زمانه‌وي طبي امکانیتلرنی یره‌تیش باره‌سیده افغانستان بیلن همکارلیک قیلیشنی سۉره‌گن.
بیاناتده روسيه ساغلیقنی سقلش وزیری‌نینگ سۉزلریگه ته‌یه‌نیب، بو مملکت افغانستان بیلن ساغلیقنی سقلش ساحه‌سیده‌گی تخنیکي همکارلیکنی کېنگه‌یتیریشگه تیار اېکنی ایتیلگن.
طالبلر و روسيه ساغلیقنی سقلش وزیرلری ساغلیقنی سقلش ساحه‌سیده‌گی قۉشمه همکارلیکنی رواجلنتیریش، علاقه‌لر و تېگیشلی اداره‌لر اۉرته‌سیده‌گی موافقلشتیریشنی کوچه‌یتیریش مهم‌لیگینی تأکیدله‌گن.
افغانستان‌ده طبي خدمتلر جوده ضعیف احوالده. بو مملکت‌نینگ ساغلیقنی سقلش ساحه‌سی ایلگری خارجي یاردملر حسابیدن قۉللب-قوّتلنگن، بیراق طالبلر حاکمیتگه قَیتگه‌چ، افغانستان‌گه کۉرسه‌تیله‌یاتگن خارجي یاردم کمه‌یگن.
دارو-درمان و زمانه‌وي طبي امکانیتلر نینگ یېتیشمسلیگی، شونینگدېک، ملَکه‌لی خادملر، اینیقسه عیال شفاکارلر نینگ کملیگی افغانستان ساغلیقنی سقلش ساحه‌سی آلدیده‌گی جدّي معمالردن بیریدیر.
طالبلر اۉتگن ییلی پاکستان‌دن دارو-درمان آلیب کیریشنی تعقیقله‌گن. اوشبو تعقیقدن سۉنگ دارولر نرخی آشگن، عینِ پیتده پاکستان دارولری ناقانوني یۉللر آرقه‌لی مملکتگه آلیب کیریله‌یاتگنی ایتیلماقده.
طالبلر پاکستان دارولری‌نینگ اۉرنینی باشقه مملکتلردن صادر قیلینه‌دیگن دارولر بیلن تۉلدیریشینی معلوم قیلگن اېدی.
جوزا آییده روسيه‌‌نینگ فارمسیون گروهی طالبلرنینگ ساغلیقنی سقلش وزیرلیگی بیلن دارو-درمان یېتکزیب بېریشنی باشلش بۉییچه کېلیشووگه اېریشگنی و شو ییل یازیده افغانستان‌گه دارو یېتکزیب بېریشنی باشلشی حقیده خبر بېریلگن اېدی. یاز فصلی یکونلنگن بۉلسه-ده، حاضرچه روسيه دارولری‌نینگ افغانستان‌گه کیریب کېلگنی حقیده هېچ قنده‌ی خبر بېریلمه‌دی.
