طالبلری رسمیلری اشتراکیده‌گی تدبیرده اوشبو گروه‌نینگ محلي قوماندانی جمعه خان فاتح مسخره قیلینگن نمایش یوزه‌سیدن بیلدیریلگن تنقیدلردن سۉنگ، طالبلرنینگ خوخستده‌گی واليسی اداره‌سی عذر سۉردی.
طالبلرنینگ خوستده‌گی واليسی مطبوعات سوزلاوچیسی مستغفر گربز شنبه آقشامیده (۱۱ میزان) ایکس اجتماعي ترماغیده ویدیو مراجعت و بیانات اعلان قیلیب، اوشبو نمایش «قصداً» اویوشتیریلمه‌گنینی ایتدی.
طالبلرنینگ خوخستده‌گی واليسی مطبوعات اداره‌سی بیاناتیده شونده‌ی دېییله‌دی: «خوست ولایتی رهبریتی مذکور مدرسه نامیدن اوشبو حرکت نتیجه‌سیده حس-تویغولری رنجیگن برچه انسانلردن صمیمي و چین قلبدن عذر سۉره‌یدی.»
طالبلرنینگ خوستده‌گی واليسی اداره‌سی ضرور چاره‌لر کۉریلگنی، دستور تشکیلاتچیلریگه جزا بېریلگنی و کېله‌جکده بونده‌ی حرکتنی تکرارله‌مسلیکلری حقیده آگاهلنتیریلگنینی بیلدیرگن.
سۉنگگی کونلرده اجتماعي ترماقلرده طالبلر رسمیلری اشتراکیده‌گی تدبیرده بیر نېچه اۉسمیر نمایش اجرا اېته‌یاتگن ویدیو ترقه‌لدی.
اوشبو دستور خوست ولایتیده‌گی طالبلر نظارتیده‌گی جهادي مدرسه‌لردن بیریده اۉتکزیلگن. اۉسمیرلر نمایشده طالبلر نینگ بدخشانده‌گی محلي قوماندانی جمعه خان فاتح نینگ حیات یۉلینی — اونینگ زابلگه والي اۉرین‌باسری اېتیب تعیینلنیشیدن تارتیب، بدخشانده‌گی نسی-درواز تومنیگه قَیتیشی و طالبان اوردوسی بیلن تۉقنه‌شوویگچه بۉلگن واقعه‌لرنی بیان قیلگن. اولر فاتح‌نی «اۉغری»، «مخالفلر بیلن همکارلیک قیلووچی» و طالبلرنینگ «دشمنی» صفتیده تصویرله‌گن.
اجتماعي ترماق فایده‌لنووچیلری طالبلر رسمیلری اشتراکیده اوشبو نمایش‌نینگ اجرا اېتیلیشینی «قبیله‌چیلیک سیاستی» همده بو گروه‌نینگ «پشتون بۉلمه‌گن طالبلرنی تحقیرلش و مسخره قیلیش» دستوری‌نینگ بیر قِسمی صفتیده بهاله‌گن.
بیر وقتلر بدخشانده‌گی نسی اولسواللیگی‌نینگ حاکمی، کېینچه‌لیک اېسه بیر آی دوامیده طالبلرنینگ زابلده‌گی والي اۉرین‌باسری بۉلگن جمعه خان فاتح بیر مدت طالبلر بیلن قوراللی تۉقنه‌شوولرگه کیریشگن. آخر-عاقبت او قۉلگه آلینیب، کابلگه آلیب کېتیلگن. حاضرده اونینگ تقدیری حقیده هېچ قنده‌ی معلومات یۉق.
