طالبلرنینگ مطبوعات سوزلاوچیسی اۉرین‌باسری حمدالله فطرت افغانستان‌نینگ بدخشان ولایتی بیلن چین‌نینگ سینکیانگ منطقه‌سینی باغلاوچی بیرینچی ترانزیت یۉلی قوریلیشی یکونلنیب، فایده‌لنیشگه تاپشیریلگنینی معلوم قیلدی.
او ایکس‌ده‌گی بیاناتیده اوشبو توپراق یۉل نینگ آچیلیش مراسمی بوگون (یک‌شنبه، ۱۲-میزان) واخجیر واديسیده طالبان رسميلری اشتراکیده اۉتکزیلگنینی ایتدی.
اوزونلیگی ۱۲۱ کیلومتر بۉلگن اوشبو یۉل بدخشان‌نینگ واخان واديسیدن سینکیانگ تامان تارتیلگن بۉلیب، افغانستان و چین اۉرته‌سیده‌گی قوروقلیکده‌گی بیرینچی ترانزیت یۉلی حسابلنه‌دی.
مذکور یۉل طالبلرنینگ قیشلاقلرنی تیکلش و رواجلنتیریش وزیرلیگی تامانیدن ۳۶۵ میلیون افغاني مبلغ عوضیگه قوریلگن. یۉل ترکیبیده ۶۶ ته سوو اۉتکزگیچ، ۴ ته کۉپریک و قریب ۴ مینگ متر اوزونلیکده‌گی ته‌یه‌نچ دېوارلر هم موجود.
ایشکاشیم اولسواللیگی‌دن چین چېگره‌سیگچه بۉلگن و اوزون واخان واديسی آرقه‌لی اۉته‌دیگن یۉل‌نینگ عمومي اوزونلیگی ۳۰۰ کیلومتردن آرتیق. حاضرچه اېسه اونینگ ۱۲۱ کیلومترلیک قِسمی برۉغیل حدودیدن واخجیر واديسی-پامیر یۉنه‌لیشی آرقه‌لی چین چېگره‌سیگچه توپراق یۉل صفتیده قوریلیب، جغل یاتقیزیلگن.
