پاکستان تشقی ایشلر وزیرلیگی اوشبو مملکت نماینده‌لری افغانستان بۉییچه «مسکو فرمتی» نینگ سکّیزینچی ییغیلیشیده اشتراک اېتیشینی معلوم قیلدی.
مذکور وزیرلیک بوگون (یک‌شنبه، ۱۲-میزان) نشر قیلگن بیاناتیده محمد صادق، باش وزیر یاردمچیسی و پاکستان‌نینگ افغانستان بۉییچه مخصوص وکیلی، شونینگدېک، اوشبو مملکت نینگ کابلده‌گی اېلچیسی ییغیلیشده پاکستان هیئانیگه رهبرلیک قیلیشینی بیلدیرگن.
افغانستان بۉییچه مسکو فرمتی‌نینگ سکّیزینچی ییغیلیشی اېرته‌گه روسيه پایتختیده بۉلیب اۉتیشی رېجه‌لشتیریلگن. طالبان‌نینگ تشقی ایشلر وزیری امیرخان منقي بوگون کابلدن مسکو تامان یۉل آلگن.
اوشبو ییغیلیشده طالبلر و پاکستان وکیللریدن تشقری، هندستان، اېران، قازاغستان، چین، قیرغیزستان، روسيه، تاجیکستان و اۉزبېکستان نینگ مخصوص وکیللری همده یوقاری مرتبه‌لی رسميلری اشتراک اېتیشی کوتیلماقده.
مذکور ییغیلیش طالبلر و پاکستان اۉرته‌سیده‌گی مناسبتلر همان کېسکین بۉلیب تورگن بیر پیتده اۉتکزیلماقده. پاکستان اوردوسی یقینده افغانستان‌نینگ بیر نېچه ولایتینی نشانگه آلگن.
روسيه‌‌نینگ کابلده‌گی اېلچیخانه‌سی «پاکستان و افغانستان (طالبان) اۉرته‌سیده دوام اېته‌یاتگن حربي تۉقنه‌شوولر همده اونینگ تینچ اهالی، جمله‌دن، باله‌لرگه تأثیری»دن خواطر بیلدیرگن.
