پاکستان‌نینگ سابق باش وزیری و قماقده سه‌قلنه‌یاتگن سیاستچی عمران‌خان طرفدارلری‌نینگ اونی آزاد قیلیش و نمایش اۉتکزیلیشی‌نینگ آلدینی آلیش بۉییچه مذاکره‌لر برباد بۉلگنیدن سۉنگ، ناراضیلیک یوریشی بوگون (یک‌شنبه، ۱۲میزان) خیبر پختونخوا ایالتیده باشلندی.
فرانسه اخبارات آژانسی خبریگه کۉره، پاکستان تحریک انصاف حزبی تامانیدن اجتماعي ترماقلرده اعلان قیلینگن ویدیولرده عمران‌خان طرفدارلری ایالت‌نینگ تورلی حدودلریده تۉپلنیب، «اوزاق یوریش» اوچون کاروانلر شکلیده یۉلگه چیققنی کۉرسه‌تیلگن.
خیبر پختونخوا ایالتی‌نینگ باش وزیری سهیل آفریدي هم اوّلراق ایکس اجتماعي ترماغیده اوشبو ناراضیلیک یوریشی اۉتکزیلیشینی معلوم قیلگن اېدی.
عمران‌خان‌نینگ قماقده سقلنه‌یاتگنیدن ناراضیلیک سۉنگگی آیلرده، اینیقسه، ۷۳ یاشلی سیاستچی‌نینگ ساغلیغی همده شفاکارلر و عایله‌سی‌نینگ او بیلن اوچره‌شیش امکانیتی باره‌سیده کوچه‌یگن.
تحریک انصاف حزبی، شونینگدېک، اۉتگن آی حبسگه آلینگن عمران‌خان‌نینگ اوچ نفر آپه‌سینی آزاد قیلیشنی طلب قیلماقده.
پاکستان حکومتیگه مخالف سیاسي رهبرلردن بیری «علامه راجا ناصر عباس» نینگ ایتیشیچه، حکومت و تحریک انصاف حزبی وکیللری اۉرته‌سیده‌گی سۉنگگی دقیقه‌ده‌گی مذاکره‌لر «باشی بېرک کۉچه‌گه» کیریب قالگن.
اونینگ قۉشیمچه قیلیشیچه، تحریک انصاف حزبی‌نینگ، جمله‌دن، عمران خانگه شفاکارلر نینگ کیریشینی تأمینلش حقیده‌گی طلبلری بۉییچه مذاکره‌لر نتیجه‌سیز یکونلنگن.
اوشبو یوریش دستلب ۲۷-سپتامبر کونی اۉتکزیلیشی رېجه‌لشتیریلگن اېدی، بیراق تحریک انصاف حزبی اونی ۴-اکتوبرگه قالدیریلگنینی اعلان قیلگن.
پاکستان حکومتی نمایشچیلرنینگ اسلام آبادگه کیریشی‌نینگ آلدینی آلیش اوچون پایتختگه آلیب بارووچی یۉللرنی ایکّی قبت قیلیب تېریلگن کانتېنېرلر بیلن تۉسیب قۉیگن.
عمران‌خان ۲۰۲۳-ییل اگوستیدن بېری قماقده سه‌قلنماقده. اۉشه ییل نینگ می آییده اونینگ حبسگه آلینیشیگه قرشی کېنگ کۉلملی ترتیبسیزلیکلردن سۉنگ، او فساد، خیانت و زۉرآورلیککه اونده‌ش کبی بیر قطار عیبلاولرگه دوچ کېلگن همده بیر نېچته ایش بۉییچه قماق جزاسیگه حکم قیلینگن.
اونینگ عایله‌سی و حزبی اعضالری سۉنگگی آیلرده اونینگ ساغلیغی و شفاکارگه مراجعت قیلیش امکانیتی باره‌سیده بیر نېچه بار خواطر بیلدیرگن.
پاکستان عالي محکمه‌سی جاري ییل اگوست آییده عمران خاننی دوالنیش اوچون فقرالیک شفاخانه‌سیگه کۉچیریش حقیده قرار چیقرگن اېدی. بیراق رسميلر او دولت شفاخانه‌سیده قیسقه مدت بۉلگنیدن سۉنگ، اونی ینه قماقخانه‌گه قَیترگن.
