«افغانستان جمهوریت جبهه‌سی» اۉز کوچلری طالبلرنینگ باميان کانلریدن قۉرغاشین آلیب کېته‌یاتگن موترلر کاروانینی «یاقیب یوبارگنینی» معلوم قیلدی.
اوشبو جبهه بیاناتیده ایتیلیشیچه، هجوم تیناوون (شنبه، ۱۱ میزان) ساعت ۲:۰۰ لر اطرافیده باميان‌نینگ «سیاه‌دره» منطقه‌سیده عملگه آشیریلگن.
«افغانستان جمهوریت جبهه‌سی» قۉشیمچه قیلیب: «افغانستان‌نینگ طبيعي و منرال بایلیکلری برچه افغان خلقیگه تېگیشلی همده بوگونگی و کېله‌جک اولادنینگ بایلیگیدیر. بیز بو کانلرنینگ ناقانوني و ترورچی مأموریت تامانیدن تالان-تاراج قیلینیشینی توخته‌ته‌میز»، دېگن.
مذکور جبهه افغانستانده‌گی کانلرنی قزیب آلیشده اشتراک اېته‌یاتگن تامانلرنی آگاهلنتیریب، «اولر حربي نشاندیر و بو ملي خیانتده اشتراک اېتیشدن واز کېچیشلری کېره‌ک»، دېیه بیلدیرگن.
«افغانستان جمهوریت جبهه‌سی» بوندن آلدین هم سرپل ولایتیده کۉمیر آلیب کېته‌یاتگن بیر نېچته موترگه اویوشتیریلگن هجوم اوچون جوابگرلیکنی اۉز ذمّه‌سیگه آلگن اېدی.
طالبلرنینگ کانلر و نفت وزیرلیگی ۱۴۰۴- ییلده باميان ولایتی‌نینگ یکاولنگ تومنیده‌گی قۉرغاشین کانلری‌نینگ بېشته حدودینی یۉل، سوو انباری و شفاخانه قوریش عوضیگه قندهار، ارزگان و میدان وردک ولایتلریده‌گی خصوصي کمپنیلرگه قزیب آلیش اوچون تاپشیرگن.
طالبلر اۉشه وقتدن بویان بو کانلردن قزیب آلینگن محصولاتلرنی منتظم روشده ساتیب کېلماقده.
