طالبلر ایچکی ایشلر وزیرلیگی مطبوعات سوزلاوچیسی عبدالمتین قانع، تیناوون صادر بۉلگن و اونینگ اوچون بیر وقت نینگ اۉزیده داعش همده «افغانستان ملي قرشیلیک جبهه‌سی» جوابگرلیکنی اۉز ذمّه‌سیگه آلگن پارتلشنی تصدیقله‌دی. او بو هجومده طالبلر استخبارات‌نینگ بیر خادیمی هلاک بۉلگنینی ایتدی.
قانع بوگون (دوشنبه، ۱۳میزان) بی‌بی‌سی بېرگن صحبتیده فيض آباد شهریده پارتلش صادر بۉلگنینی و استخبارات خادملریدن بیری هلاک بۉلگنینی ایتدی.
اونینگ سۉزلریگه کۉره، اوشبو حادثه‌ده هلاک بۉلگن شخص طالبلرنینگ فيض آباددهگی استخبارات اداره‌ی باشلیغی یاکه اونینگ اۉرین‌باسری بۉلمه‌گن.
«افغانستان ملي قرشیلیک جبهه‌سی» و «داعش خراسان» گروهی کېچه بدخشانده صادر بۉلگن پارتلش اوچون جوابگرلیکنی اۉز ذمّه‌سیگه آلیب، هجومده طالبان استخبارات خادملری نشانگه آلینگنینی بیلدیرگن.
داعش بیاناتیده اوشبو هجومده طالبلر استخباراتی‌نینگ منصبدار شخصلریدن بیری نشانگه آلینگنی ایتیلگن.
داعش خراسان بیاناتیگه کۉره، ماینلشتیریلگن موترسیکل یاردمیده عملگه آشیریلگن اوشبو هجوم نتیجه‌سیده طالبلر استخبارات منصبداری و اونینگ بیر قۉریقچیسی یره‌لنگن، ینه بیر قۉریقچیسی اېسه هلاک بۉلگن.
بو آره‌ده «افغانستان ملي قرشیلیک جبهه‌سی» هم کېچه اوشبو هجوم اوچون جوابگرلیکنی اۉز ذمّه‌سیگه آلگن اېدی.
اوشبو جبهه بیاناتیده بدخشان ولایتی‌نینگ مرکزی فیض آباد شهری اوچون طالبان استخبارات باشلیغی‌نینگ اۉرین‌باسری نشانگه آلینگنی ایتیلگن اېدی.
جبهه نینگ دعواسیگه کۉره، هجوم نتیجه‌سیده طالبان استخباراتی‌نینگ اوشبو منصبداری و اونینگ ایکّی قۉریقچیسی هلاک بۉلگن.
اوّل هم داعش و «افغانستان ملي قرشیلیک جبهه‌سی» طالبلر منصبدارلریگه قرشی اویوشتیریلگن نشانلی هجوملر اوچون جوابگرلیکنی اۉز ذمّه‌سیگه آلگن.
جمله‌دن، «افغانستان ملي قرشیلیک جبهه‌سی» جاري ییل نینگ۲۲اسد سنه‌سیده فیض آباددهگی طالبلر حاکمی عبدالرحمن منصورنی اۉلدیریش اوچون جوابگرلیکنی اۉز ذمّه‌سیگه آلگن اېدی. بوندن بیرآز آلدین، ۶ اسد کونی اېسه داعش بدخشانده‌گی طالبلر اخبارات و مدنیت اداره‌سی باشلیغی نینگ اۉلدیریلیشی اوچون جوابگرلیکنی اۉز ذمّه‌سیگه آلگن اېدی.
