روسيه تشقی ایشلر وزیری سېرگی لاورف افغانستان بۉییچه سکّیزینچی «مسکو فرمتی» ییغیلیشیده ناتونینگ افغانستانده یاکه اونگه قۉشنی دولتلرده موجود بۉلیشی مامقبول اېکنینی ایتدی.
روسيه تشقی ایشلر وزیری ییغیلیش نینگ آچیلیش مراسمیده‌گی نطقیده: «هر قنده‌ی بهانه آستیده ناتونینگ حربي تاسیساتی افغانستان حدودیده یاکه اونگه قۉشنی دولتلرده جایلشتیریش مطلقا مامقبول اېکنینی ینه بیر بار تأکیدله‌ماقچیمن»، دېدی.
لاورف نطقی دوامیده روسيه افغانستانده منطقوي خوفسیزلیکنی مستحکملش باره‌سیده طالبلر بیلن همکارلیک قیلیشینی هم ایتدی.
اونینگ ایتیشیچه، «مسکو فرمتی» ییغیلیشی افغانستان‌نینگ مستقل و برقرار دولت صفتیده رواجلنیشیگه یاردم بېره‌دی همده بوتون منطقه‌ده تینچلیک و برقرارلیکنی تأمینلشگه حصه قۉشه‌دی.
روسيه بوندن اوّل هم امریکا و ناتوگه اعضا دولتلرنینگ افغانستانگه قَیته جایلشیشیگه قرشی اېکنینی بیر نېچه بار بیلدیرگن.
بو حالت امریکا و ناتو کوچلری قریب بېش ییل اوّل افغانستانده ۲۰ ییل دوام اېتگن حربي اشتراکیدن سۉنگ مملکتنی ترک اېتگن بیر پیتده یوز بېرماقده.
افغانستان بۉییچه سکّیزینچی «مسکو فرمتی» ییغیلیشی روسيه تشقی ایشلر وزیری سېرگی لاورف طالبان تشقی ایشلر وزیری امیرخان متقي و منطقه دولتلری وکیللری اشتراکیده روسيه پایتختیده باشلندی.
ییغیلیشده نطق سۉزله‌یاتگن سېرگی لاورف اۉز سۉزی نینگ باشیده مسکو طالبلر نظارتیده‌گی افغانستان بیلن منطقوي خوفسیزلیکنی مستحکملش باره‌سیده‌گی همکارلیکنی دوام اېتتیریشینی ایتدی.
او شونینگدېک، روسيه افغانستانگه گومانیتار یاردم یوباریشنی هم دوام اېتتیریشینی و نوبتده‌گی یاردم یوکلری ایکّی آی ایچیده افغانستانگه یېتیب باریشی کوتیله‌یاتگنینی معلوم قیلدی.
روسيه تشقی ایشلر وزیرلیگی معلوماتیگه کۉره، سکّیزینچی «مسکو فرمتی» ییغیلیشیده روسيه و طالبان وکیللریدن تشقری هندستان، ایران، قازاغیستان، چین، پاکستان، تاجیکستان و اۉزبېکستان وکیللری همده یوقاری مرتبه‌لی عملدارلری اشتراک اېتماقده. بلاروس و مثردن هیئتلر اېسه مهمان صفتیده تکلیف قیلینگن.
روسيه تشقی ایشلر وزیرلیگی‌نینگ قۉشیمچه قیلیشیچه، افغانستان بیلن سیاسي و اقتصادي علاقه‌لرنی رواجلنتیریش، شونینگدېک، تروریزم و گیاهوند مادّه‌لر نینگ ناقانوني سوداسیگه قرشی کوره‌شیش ساحه‌سیده منطقوي همکارلیکنی کوچه‌یتیریش «مسکو فرمتی» ییغیلیشیده‌گی مذاکره‌لر نینگ اوستوار یۉنه‌لیشلری بۉله‌دی.
