روسيه‌‌نینگ افغانستان بۉییچه مخصوص وکیلی ضمیر کابلوف‌نینگ ایتیشیچه، «مسکو فرمتی» نینگ سکّیزینچی ییغیلیشی طالبان و پاکستان اۉرته‌سیده‌گی کېلیشماوچیلیکلر سببلی قۉشمه بیانات نشر قیلینمسدن یکونلنگن.
روسيه نینگ افغانستان بۉییچه مخصوص وکیلی مطبوعات انجمنیده شونده‌ی دېدی: «یکوني قۉشمه بیاناتنی تیارلش چاغیده بیر معماگه دوچ کېلدیک. معما شوندن عبارت اېدیکی، افغان و پاکستانلیک هم‌کسبلریمیزنینگ عمومي فکری یۉق اېدی. بوندن افسوسده‌میز.»
او قۉشیمچه قیلدی: «افغانستانلیک هم‌کسبلریمیز بو ییل [قۉشمه بیانات لایحه‌سی] متنیده تروریزم مسأله‌سیده افغانستانگه حددن تشقری کۉپ اشاره قیلینگن، دېب حسابلشدی. راستینی ایتسه‌م، بو بیز اوچون حیرتلنرلی بۉلدی، چونکه اۉتگن ییلگی، یعنی یېتّینچی ییغیلیشدن کېینگی متنده هم خودّی شو عباره و افاده‌لر ایشله‌تیلگن اېدی. شونگه قره‌مه‌ی، افغان تامانی نینگ فکریچه، اۉشندن بېری ایکّی تامانله‌مه مناسبتلرده‌گی وضعیت اۉزگرگن و بو ییلگی بیانات اولر اوچون مقبول اېمس.»
کابلوف نینگ ایتیشیچه، «مسکو فرمتی» اوشبو قۉشمه بیاناتسیز هم اۉز فعالیتی و ایشینی دوام اېتتیریشی ممکن. بیراق بونده‌ی بیانات‌نینگ قبول قیلینیشی اوشبو جریان عنعنه‌لریگه کۉپراق ماس کېلر و معقولراق بۉلردی.
روسيه نینگ مخصوص وکیلی، شونینگدېک، ییغیلیش‌نینگ برچه اشتراکچیلری، استثناسیز، طالبان و پاکستاننی بیر-بیریگه قرشی حربي حرکتلردن تيیلیشگه چقیرگنینی ایتدی. اونینگ تأکیدلشیچه، بونده‌ی حرکتلردن اېنگ کۉپ ضرر تینچ اهالیگه یېتماقده.
اونینگ قۉشیمچه قیلیشیچه، اشتراکچیلر سیاسي و دیپلوماتیک یېچیم تاپیشگه یاردم بېریش همده بو جریاننی یېنگیللشتیریشگه تیار اېکنلیکلرینی هم بیلدیرگن.
«مسکو فرمتی» نینگ سکّیزینچی ییغیلیشی بوگون روسيه پایتختیده روسيه تشقی ایشلر وزیری سېرگی لاوروف، طالبان تشقی ایشلر وزیری امیرخان متقي همده هندستان، اېران، قازاغیستان، چین، پاکستان، تاجیکستان و اۉزبېکستان وکیللری اشتراکیده باشلنگن اېدی. بلاروس و مصردن هیئتلر هم اوشبو ییغیلیشگه مهمان صفتیده تکلیف قیلینگن.
طالبلر تشقی ایشلر وزیری اۉز نطقیده پاکستاننی افغانستاننی بې‌قرارلشتیریشگه اورینه‌یاتگنلیکده عیبله‌دی و بو مملکت ایکّی دولت چېگره‌سی یقینیده مینگلب حربيلرینی تۉپله‌گنینی بیلدیردی.
