سعوديه عربستانی تامانیدن قۉللب-قوّتلنه‌یاتگن یمن حکومت کوچلری بوگون (دوشنبه، ۱۳ میزان) باب المندب بۉغازیده‌گی مهم موضعلرنی اېگه‌لله‌دی.
حربي و حکومت منبعلری‌نینگ ایتیشیچه، بو کوچلر ایران تامانیدن قۉللب-قوّتلنه‌یاتگن حوثيلرنی اوشبو استراتیژیک مهم سوو یۉلیدن سیقیب چیقریشگه اورینماقده.
رویترز آژانسی اوچ نفر حربي و بیر نفر حکومت منبعسی‌نینگ معلوم قیلیشیچه، حکومت کوچلری باب المندب بۉغازیگه قره‌گن زباب حدودی نینگ کتّه قِسمینی اېگه‌لله‌گن و سعوديه عربستانی باشچیلیگیده‌گی ائتلاف‌نینگ کېنگ کۉلملی هوا کۉمه‌گیده اوشبو حدود اوستیدن تۉلیق نظارتنی مستحکملشگه حرکت قیلماقده.
حوثيلرگه یقین رسانه‌لر بوندن آلدین حکومت کوچلری‌نینگ اوشبو حدودده‌گی ایلگریلشینی رد اېتیب، بونده‌ی دعوالرنی «مطلقا ناتۉغری» دېب اته‌گن اېدی.
شو بیلن بیرگه، بېش نفر حکومت منبعسی حوثيلر یک‌شنبه کونی کېچقورون مهم ته‌یز شهریگه آلیب بارووچی تاغ یۉلی نینگ اَیریم قِسملریده ایلگریلب، او یېرده‌گی حکومت کوچلرینی قورشه‌ب آلگنینی بیلدیردی. ینه بیر حکومت منبعسی اېسه اوشبو یۉل نینگ اوزیلگنینی رد اېتدی.
یمن خلق‌ارا مقیاسده تن آلینگن حکومتی یک‌شنبه کونی حوثيلر نظارتیده‌گی حدودلرنی قَیتریب آلیش اوچون حربي عملیات باشلنگنینی اعلان قیلدی.
یمن جمهور رییسلیک کېنگشی رئیسی رشاد العلیمی «مملکتنی ترورچی جنگریلر چنگلیدن آزاد قیلیش»گچه کوره‌شنی دوام اېتتیریشلرینی ایتدی.
یمن حکومت کوچلرینی قورال-یراغ بیلن تأمینله‌یاتگن و حربي تیارگرلیکدن اۉتکزه‌یاتگن سعوديه عربستانی اوشبو حربي عملیاتنی هوادن قۉللب-قوّتله‌ماقده. رياض حوثيلرنی آرتگه سوریش، قیزیل دېنگیزده اېرکین قتناونی تأمینلش و بو گروه نینگ سعوديه حدودیگه اویوشتیره‌یاتگن هجوملریگه برهم بېریش اوچون اتفاقچیلریدن لاگیستیکه یاردمینی سۉره‌گن.
سعوديه عربستانی دوشنبه کونی باب المندب بۉغازی و یمن قوروقلیکده‌گی کوچلرینی هوادن حمایه قیلیش اوچون مملکتده‌گی یوزلب نشانلرگه ضربه‌لر بېرگنینی معلوم قیلدی.
یمن حکومتی هجوملرنی بیر نېچه جبهه‌ده، جمله‌دن مملکت پایتختی ثنا ولایتیده باشله‌گنینی بیلدیردی.
یمن‌نینگ بیر نېچه جبهه‌ده اوروش دوام اېته‌یاتگن بۉلسه-ده، اېنگ شدّتلی تۉقنه‌شوولر مملکت‌نینگ جَنوبی-غربیده — هم بۉغاز یقینیده‌گی قیرغاق حدودلریده، هم تیز اطرافیده‌گی تېپه‌لیکلرده یوز بېرماقده. حوثیلر بو یېرده حکومت کوچلرینی قورشه‌ب آلیشگه اورینماقده.
حکومت نینگ بېش نفر حربي منبعسی یک‌شنبه کونی کېچقورون بو گروه جنگچیلری یۉل اوستیدن بلندلیکده جایلشگن التوربه شهریده ینگی ایلگریلشلرنی عملگه آشیرگنینی ایتدی. بیراق باشقه بیر حکومت منبعسی بو معلوماتنی رد اېتدی.
شو بیلن بیرگه، حوثيلر نظارتیده‌گی اخبارات آژانسی دوشنبه کونی حربي منبعگه ته‌یه‌نیب خبر بېریشیچه، بو گروه تیز ولایتی نینگ الموواسیت تومنیدن حکومت کوچلرینی چیقریب یوبارگن و یمن مؤقت جمهور رییسلیک کېنگشی رئیسی رشادالالیمي نینگ اوییگچه ایلگریله‌گن.
