بیرلشگن ملتلر تشکیلاتی‌نینگ انسان حقوقلری کېنگشی قطعنامه قبول قیلیب، ریچارد بنت نینگ افغانستان بۉییچه مخصوص گزارش‌لر صفتیده‌گی وکالتینی ینه بیر ییلگه اوزه‌یتیردی.
بیرلشگن ملتلر تشکیلاتی‌نینگ انسان حقوقلری کېنگشی بیاناتیگه کۉره، مذکور قطعنامه بوگون (دوشنبه، ۱۳ میزان) آواز بېریشسیز قبول قیلینگن.
بنت ایکس پلاتفورمیده یازیشیچه، ینگی قطعنامه‌گه کۉره، اونگه افغانستانده‌گی «آزچیلیکلر» نینگ احوالی حقیده تدقیقات تیارلش و اونی ۲۰۲۷-ییل سپتمبر آییده کېنگش ییغیلیشیده تقدیم اېتیش وظیفه‌سی یوکله‌تیلگن.
اونینگ قۉشیمچه قیلیشیچه، قطعنامه‌ده ۲۰۲۷-ییل جون آییده افغانستانده‌گی جندر بیلن باغلیق خواطرلرگه اعتبار قره‌تیلگن «کوچه‌یتیریلگن اینتېره‌کتیو ملاقات» اۉتکزیش هم کۉزده توتیلگن.
ریچارد بنت‌نینگ افغانستان بۉییچه انسان حقوقلری مخصوص معروضه‌چیسی صفتیده‌گی وکالتی اونینگ افغانستانگه کیریشی هنوز تعقیقلنگن بیر پیتده اوزه‌یتیریلدی.
طالبان ۱۴۰ث- ییل نینگ اسد آییده جناب بنت‌نینگ افغانستانگه کیریشینی تعقیقلب، اونی اۉزلریگه قرشی «پراپه‌گنده» آلیب باریشده عیبله‌گن.
بیرلشگن ملتلر تشکیلاتی‌نینگ انسان حقوقلری کېنگشی بیر نېچه بار بو تعقیقنی بېکار قیلیشگه چقیرگن، بیراق طالبان هنوز ریچارد بنتگه افغانستانگه باریشگه رخصت بېرمه‌یپتی.
ریچارد بنت افغانستان بۉییچه انسان حقوقلری مخصوص گزارشگری اېتیب تعیینلنگنیدن بېری مملکتده‌گی انسان حقوقلری حالتی حقیده کۉپلب حساباتلر تیارله‌گن. او طالبلر تامانیدن صادر اېتیلگن بیر قطار سودسیز قاتللیکلر، اۉزباشیمچه‌لیک بیلن حبسگه آلیش، تعقیب، قییناقلر همده افغانستان خلقی انسان حقوقلری و اساسي حقوقلری‌نینگ بوزیلیشی حالتلرینی حجتلشتیرگن.
