بیرلشگن ملتلر تشکیلاتی‌نینگ باش کاتبی آنتونیو گوترش‌نینگ ایتیشیچه، بیرلشگن ملتلر تشکیلاتی افغانستان وطنداشلری‌نینگ پاکستاندن قَیتریلیشی اختیاري، خوفسیز و انسان قدر-قیمتی سقلنگن حالده عملگه آشیریلیشینی تأمینلش اوچون پاکستان بیلن همکارلیک قیله‌دی.
بیرلشگن ملتلر تشکیلاتی‌نینگ باش کاتبی اوشبو حقده بوگون، سه‌شنبه کونی، ۱۴ میزان کونی اسلام آبادده پاکستان تشقی ایشلر وزیری محمد اسحاق‌دار در بیلن اۉتکزیلگن مطبوعات انجمنیده معلوم قیلدی.
اونینگ ایتیشیچه، پاکستان اۉنلب ییللر دوامیده ماجرا و بې‌قرارلیکدن قاچیب کېلگن میلیونلب افغانستانلیکلر اوچون اۉز اېشیکلرینی آچیب کېلگن.
آنتونیو گوترش شونینگدېک، اولر یاردم و خوفسیزلیک ایزلب کېلگن انسانلر بیلن قۉلیدن کېلگن برچه امکانیتلرینی بهم کۉرگنینی ایتدی.
پاکستان ۲۰۲۳-ییلدن باشلب، خوفسیزلیک بیلن باغلیق وضعیت نینگ یامانلشیشی آرتیدن افغانستان وطنداشلری‌نینگ مملکتدن چیقریشنی باشله‌گن. بو مملکت افغانستانلیک مهاجرلرنینگ وقتینچه‌لیک یشش حجتلرینی بېکار قیلدی، اولرنینگ ویزه‌لرینی اوزه‌یتیرمه‌دی و نتیجه‌ده پولیس اولرنی حبسگه آلیب، دېپورت قیله باشله‌دی.
بیرلشگن ملتلر تشکیلاتی معلوماتلریگه کۉره، فقط ۲۰۲۵-ییلدن جاري ییل‌نینگ اپرېل آییگچه ۱.۲۵ میلیون افغانستانلیک مهاجر پاکستاندن دېپورت قیلینگن.
افغانستانلیک مهاجرلرنینگ پاکستاندن چیقریب یوباریلیشی کېنگ کۉلملی ناراضیلیکلرگه سبب بۉلگن. انسان حقوقلری تشکیلاتلری بیر نېچه بار بو جریاننی توخته‌تیشگه چقیرگن، بیراق دېپورت جریانی هنوز دوام اېتماقده.
