محلي منبعلر پنجشیرده طالبلر بو ولایتده اۉز حکومتینی قۉللب-قوّتلش مقصدیده قریب ۵۰۰ کیشی دیني علما اشتراکیده ییغیلیش اۉتکزگنینی اَیتماقده.
منبعلرگه کۉره، اوشبو ییغیلیش بوگون (سه‌شنبه، ۱۴ میزان) طالبلرنینگ پنجشیرده‌گی «مخصوص لوا»سی تامانیدن گروه‌نینگ ولایت حاکمی اداره‌سی همکارلیگیده اۉتکزیلگن.
منبعلرنینگ ایتیشیچه، ییغیلیشده طالبلرنینگ پنجشیر ولایتیده‌گی حاکمی محمد آغه حکیم و اوشبو گروه طرفداری بۉلگن اَیریم دیني علمالر نطق سۉزله‌گن. اولر علمالردن طالبلر حکومتینی قۉللب-قوّتلشنی و خلقنی هم بو توزومنی قۉللب-قوّتلشگه چقیریشنی سۉره‌گن.
منبعلر معلوماتیگه کۉره، طالبلر حاکمی اوّلگی حکومتلر دوریده افغانستان‌ده خارجي دولتلرنینگ غایه‌لری و مدنیتی ترغیب قیلینگنینی ایتگن. اونینگ تأکیدلشیچه، بو غایه‌لر «اسلام امیرلیگی» بیلن خلق اۉرته‌سیده مصافه پیدا بۉلیشیگه سبب بۉلگن و حاضر دیني علمالرنینگ وظیفه‌سی خلق نینگ فکرلرینی اصلاح قیلیشدن عبارت.
منبعلرگه کۉره، کابلدهگی پول خشتی مسجدی خطیبی مولوی نقیب‌الله هم اوشبو ییغیلیشده قتنه‌شگن و باشقه دیني علمالرنی طالبان توزومینی قۉللب-قوّتلب، اۉز آوازلرینی بلند کۉتریشگه چقیرگن.
منبعلر خبریگه کۉره، ییغیلیشده قتنه‌شگن دیني علمالر پنجشیرده‌گی طالبلر اواسواللیک حاکملری تامانیدن اوشبو ییغیلیشگه آلیب کېلینگن.
طالبلر رسميلری اوشبو گروه حکومتیگه نسبتاً ناراضیلیکلر کوچه‌ییب باره‌یاتگن بیر پیتده وضعیتنی نظارت آستیگه آلیشگه حرکت قیلماقده.
بو گروه بیر نېچه بار دیني علمالر، قبیله و محلي نفوذلی شخصلردن خلقنی اۉز حکومتینی قۉللب-قوّتلشگه اونده‌ش و رغبتلنتیریشنی سۉره‌گن.
