افغانستان‌نینگ بیرلشگن ملتلر تشکیلاتیدهگی نماینده‌لیگی سرپرستی نصیر احمد فایق تروریزم نینگ برچه شکللرینی قاره‌لش کېره‌کلیگینی و ترورچیلر اۉرته‌سیده «یخشی» و «یامان» دېگن فرق بۉلمسلیگی لازملیگینی ایتدی.
فایق بیرلشگن ملتلر تشکیلاتی‌نینگ عمومی ییغیلیشی‌نینگ آلتینچی کمیته‌سیده «خلق‌ارا تروریزمنی یۉق قیلیش چاره‌لری» موضوعسیده اۉتکزیلگن ییغیلیشده افغان خلقی تروریزم و اېکسترېمیستیک گروهلردن وکیل کوچ صفتیده فایده‌لنیش عاقبتیده چوقور عذاب-عقوبتلرنی باشدن کېچیرگنینی تأکیدله‌دی.
او شونده‌ی دېدی: «بیز تروریزمنی قه‌یېرده و کیم تامانیدن صادر اېتیلیشیدن قطع نظر — قطعي قاره‌له‌یمیز. هېچ قنده‌ی سیاسي مقصد، مفکوروي دعوا یاکه دیني آقلاو تروریستیک زۉرآورلیکنی آقله‌ی آلمه‌یدی».
فایق ترورچیلر اۉرته‌سیده «یخشی» و «یامان» دېگن فرق قیلینمسلیگی کېره‌کلیگینی تأکیدله‌دی.
فایق اوشبو ییغیلیشده قیلگن بیاناتیده ایتیلیشیچه، طالبلر حاکمیتگه کېلگنیدن سۉنگ و قانوني حکومت یۉقلیگی شرایطیده «اېکسترېمیزم و تروریزم» افغانستان و منطقه اوچون جدّي تهدید بۉلیب قالماقده.
اونینگ ایتیشیچه، بیرلشگن ملتلر تشکیلاتی‌نینگ گزارشلریده افغانستانده تروریستیک گروهلر‌نینگ موجودلیگی و فعالیتی بیر نېچه بار حجتلشتیریلگن و طالبان بو باره‌ده جوابگرلیککه تارتیلیشی کېره‌ک.
فایق «افغانستان حدودی هېچ قچان ترورچیلر اوچون خوفسیز باش‌پناه یاکه باشقه دولتلرگه تهدید سالیش میدانیگه ایلنمسلیگی کېره‌ک»، دېب تأکیدله‌دی.
او پاکستان‌نینگ افغانستان حدودیگه اویوشتیره‌یاتگن و تروریزمگه قرشی کوره‌ش دېب اته‌یاتگن هجوملرینی «ناقانوني» دېب بهاله‌دی و شونده‌ی دېدی: «تروریزمگه قرشی کوره‌ش ناقانوني هجوملرنی یاکه تینچ اهالی‌نینگ حیاتیگه بې‌پروالیکنی آقله‌ی آلمه‌یدی. افغانستان خلقی تروریستیک زۉرآورلیک یاکه اولرنینگ حیاتی و تیریکچیلیگینی خوف آستیگه قۉیه‌دیگن حربي جواب چاره‌لری‌نینگ نرخینی تۉله‌مسلیگی کېره‌ک».
او خلق‌ارا همجمعیننی «برقرار جواب» دایره‌سیده افغانستان خلقی‌نینگ اراده‌سیگه اساسلنگن، خلق آلدیده جوابگر و مشروع قانوني حکومتنی قۉللب-قوّتلشگه چقیردی. بونده‌ی حکومت مملکت نینگ خلق‌ارا مجبوريتلرینی بجریش امکانیتیگه اېگه بۉلیشی کېره‌ک.
افغانستان‌نینگ بیرلشگن ملتلر تشکیلاتیدهگی دایمی سرپرستی عیاللر و قیزلرنینگ حقوقلرینی تیکلش همده عیاللر نینگ تۉلیق اشتراکینی تأمینلشگه اورغو بېردی. او تروریزمگه ثمره‌لی قرشی کوره‌شیش اوچون خلق‌ارا همجعیت پرینسپیال و موافقلشتیریلگن یاندشوونی قبول قیلیشی کېره‌کلیگینی ایتدی.
