امریکا قوشمه ایالتلری جمهور رئیس اۉرین باسریی جی‌دی ونس، یېتّی آیلیک اوروشگه برهم بېریش اوچون ایران یورانیومنی باییتیش درجه‌سینی سېزیلرلی درجه‌ده کمه‌یتیریشی کېره‌کلیگینی ایتدی.
وېنس رویترز اخبارات آژانسی‌‌گه بېرگن صحبتیده بو اوروشنی توگه‌تیش اوچون امریکا نینگ اېنگ مهم طلبی اېکنینی، بو نینگ آرقه‌لی ابران نینگ هسته قورالیگه اېگه بۉلیشی‌نینگ آلدینی آلیشگه ایشانچ حاصل قیلینیشینی تأکیدله‌دی.
وېنس ایرانگه مراجعت قیلیب، شونده‌ی دېدی: «اگر سیز هسته قورالینی ایسته‌مسه‌نگیز، اونده نېگه ۶۰ فایزگچه باییتیلگن یاقیلغیگه احتیاجینگیز بار؟ اگر هسته قورالی یره‌تمسلیک مجبوريتینگیزنی نمایش قیلماقچی بۉلسنگیز، یوقاری درجه‌ده باییتیلگن یاقیلغی ایشلب چیقرمنگ. بو جوده اساسي مسأله.»
امریکا جمهور رئیس اۉرین باسریی «اگر ایرانلیکلر هسته قورالی یره‌تمسلیک باره‌سیده‌گی مجبوريتلرینی کۉرسه‌تماقچی بۉلسه‌لر، یورانیومنی باییتیش صلاحیتلری بۉییچه مضمونلی چاره‌لر کۉریشلری کېره‌ک»، دېیه تأکیدله‌دی.
اونینگ قۉشیمچه قیلیشیچه، هر قنده‌ی کېلیشوو ایران نینگ هستوي باییتیش صلاحیتینی کمه‌یتیریشینی طلب قیله‌دی. یعنی، کېله‌جکده هستوي فعالیتنی کمه‌یتیریش بۉییچه شونچه‌که کفالتلر بېریلیشی یېترلی اېمس.
امریکانینگ اساسي مذاکره‌چیسی صفتیده کۉریله‌یاتگن ج.د. ونس ایرانلیک مذاکره‌چیلر نینگ وکالتلری باره‌سیده هم شبهه بیلدیردی.
ونس‌نینگ ایتیشیچه، «واشنگتن تهران‌ده اصلیده کیم قرار قبول قیلیشیگه ایشانچی کامل اېمس».
اونینگ سۉزلریگه کۉره، ایران جمهور رییسی مسعود پزشکيان و تشقی ایشلر وزیری عباس عراقچی امریکا بیلن مذاکره‌لرده ایران تامانینی وکیللیک قیلماقده، بیراق واشنگتن اولرنینگ حاکمیت توزیلمه‌سیده قنچه‌لیک وکالتگه اېگه اېکنینی انیق بیلمه‌یدی.
امریکا جمهور رییسی دونالد ترامپ هم کېچه بو باره‌ده‌گی اوّلگی بیاناتلرینی تکرارلب، ایراننی اصلیده کیم باشقه‌ره‌یاتگنینی هېچ کیم بیلمسلیگینی ایتدی.
بیراق ایران تشقی ایشلر وزیرلیگی مطبوعات سوزلاوچیسی اسمایل بقایی بوندن ایکّی کون آلدین بو مسأله اصلیده عکسینچه اېکنینی تأکیدله‌گن اېدی.
او ژورنالیستلرگه: «معما ایران رسميلری‌نینگ وکالتیده اېمس، بلکه امریکا رسميلری‌نینگ قره‌مه-قرشی پازیتسيه‌لری و قره‌مه-قرشی خبرلریده‌دیر»، دېدی.
