بیرلشگن ملتلر تشکیلاتی‌نینگ انسان‌پرورلیک یاردملرنی موافقلشتیریش اداره‌سی (اوچا)نینگ ایتیشیچه، پارتلاوچی بویوملرنینگ قالدیقلری همان افغانستانده کونده‌لیک تهدید بۉلیب قالماقده. اهالی اوچون یشش محیطینی خوفسیز قیلیش اوچون ماینلرنی تازه‌لش لایحه‌لرینی دایمي مالیوي قۉللب-قوّتلش ضرور.
اوچا بوگون (چهارشنبه، ۱۵میزان) نشر قیلگن گزارشیده ایتیلیشیچه، جاري ییل نینگ ۱-جنورییدن اگوست آیی آخریگچه اوروشلردن قالگن پارتلاوچی بویوملر عاقبتیده جبرلنگنلرنینگ ۷ه فایزینی باله‌لر تشکیل اېتگن.
اوشبو تشکیلات خوف درجه‌سی یوقاری بۉلیشیگه قره‌مه‌ی، افغانستانده‌گی ماینلرنی تازه‌لش لایحه‌لریگه مالیوي یاردم کمه‌یگنینی بیلدیرگن.
اوچا گزارشیگه کۉره، «۲۰۲۶-ییلگی گومانیتار رېجه» اساسیده طلب اېتیلگن جمع‌ی ۱۴.۵میلیون دالرلیک مبلغ نینگ اتیگی ۴.۳میلیون دالری تأمینلنگن. نتیجه‌ده اوشبو لایحه‌ده ۱۰.۲میلیون دالر مقداریده مبلغ یېتیشماوچیلیگی موجود.
اوچا اداره‌سی اعضاسی اولگا چرفکو شونده‌ی دېیدی: «افغانستان تشقریدن قره‌گنده عادي و خوفسیزدېک کۉرینه‌دیگن حدودلرگه اېگه، اما یېر آستیده اۉلیم یاکه تنه نینگ بیرار اعضاسیدن اَیریلیشگه سبب بۉلیشی ممکن بۉلگن بویوملر یشیرینگن.»
اونینگ ایتیشیچه، بو خوفلی بویوملر اۉنلب ییللر آلدین یاکه یقینده اۉرنه‌تیلگن بۉلیشی ممکن.
چرفکو قندهار ولایتی‌نینگ زژی اولسواللیگیده ۱۹۸۰- ییللرگه عاید بۉمبه‌نی نظارت آستیده پارتله‌تیش عملیاتیده اشتراک اېتیب، اوشبو بۉمبه ضررسیزلنتیریلیشیدن ایکّی کون آلدین محلي اهالی وکیلی تامانیدن تاپیلگنینی ایتگن.
او افغانستانده ماینلرنی تازه‌لش گروهلری فعالیتینی دوام اېتتیریشنی «جوده مهم» دېب اته‌گن و بو گروهلر بوتون مملکت بۉیلب اهالی خوفسیزلیگی اوچون اۉنلب ییللیک اوروشلردن قالگن پارتلاوچی بویوملرنی تاپیب، ضررسیزلنتیره‌یاتگنینی بیلدیرگن.
اوچا نشر قیلگن ویدیو گزارش‌ده چرفکو ماینلرنی تازه‌لش لایحه‌لریگه مالیوي یاردم نینگ کمه‌ییشی آدملر کۉزگه کۉرینمه‌یدیگن تهدید بیلن یششگه مجبور بۉله‌یاتگنینی انگله‌تیشینی ایته‌دی.
او تأکیدله‌گن: «هر بیر دهقان اۉز دله‌سیده خاطرجمع یوریشی، باله‌لر اېسه خوفسیز محیطده اۉینشی اوچون بو تهدیدنی برطرف اېتیش، اوروشلردن قالگن برچه پارتله‌مه‌ی قالگن قوراللرنی تازه‌لش مقصدیده دایمي قۉللب-قوّتلش ضرور.»
