اروپا اتفاقی اعضالری ینگی رېجه اساسیده اتفاق حدودیدن تشقریده مهاجرلرنی مرکزلرینی تشکیل اېتیشگه کېلیشیدی.
«یورو نیوز» خبریگه کۉره، ینگی «اروپا نینگ قَیتریش تۉغریسیده‌گی دیرېکتیفسی» جاري آی نینگ ۱-کون لوکزامبورک بۉلیب اۉتگن اروپا اتفاقیگه اعضا دولتلر وزیرلری ییغیلیشیده تصدیقلنگن. اونگه کۉره، دولتلر بیر-بیری تامانیدن چیقریلگن قَیتریش تۉغریسیده‌گی قرارلرنی تن آله‌دی و اروپا اتفاقیدن تشقریده «قَیتریش مرکزلری» تشکیل اېتیشی ممکن.
یونان مهاجرت وزیری تانوس پلوریس‌نینگ ایتیشیچه، بیرینچی قَیتریش مرکزی ۲۰۲۷-ییل نینگ ایکّینچی یرمیده افریقانینگ نامی آشکار اېتیلمه‌گن بیر دولتیده آچیلیشی ممکن.
بیرلشگن ملتلر تشکیلاتی‌نینگ انسان حقوقلری بۉییچه اداره‌سی بو قانونده میزبان مملکتلرده نظارت، بېریش حقوقی و شخصلرنی سقلش شرطلری بۉییچه انیق قاعده‌لر موجود اېمسلیگیدن آگاهلنتیردی.
اروپا اتفاقیگه اعضا دولتلر، جمله‌دن، کۉپلب افغان فقرالریگه قَیتیش تۉغریسیده قرارلر چیقرگن و اولرنی طالبلر نظارتیده‌گی افغانستانگه دېپورت قیلیشگه اورینماقده.
شولر قطاریده آلمان و سویس عملده مهاجرلرنی افغانستانگه دېپورت قیلیشنی باشله‌گن، اروپانینگ ینه بیر قطار دولتلری هم مهاجرلرنی افغانستانگه چیقریب یوباریش یۉلینی ایزله‌ماقده.
اروپا اتفاقی نینگ ینگی رېجه‌سی، شونینگدېک، خوفسیزلیککه تهدید دېب حسابلنگن شخصلرگه چېکلنمه‌گن مدتگه کیریشنی تعقیقلش و ۲۴ آیدن آرتیق مدتگه حبسده سقلش امکانینی بېره‌دی.
اروپا اتفاقیگه اعضا دولتلر وزیرلری اتفاق نینگ ایچکی ایشلر کېنگشی ییغیلیشیده یشش حقوقیگه اېگه بۉلمه‌گن شخصلر اروپا اتفاقی حدودینی ترک اېتیشی و مسوول اداره‌لر بیلن همکارلیک قیلیشی کېره‌ک، دېگن قرارگه کېلگن.
اولرنینگ قراریگه کۉره، اگر مهاجرلر قَیتریلیش مسأله‌سیده رسميلر بیلن همکارلیک قیلمسه، اجتماعي نفقه و یاردملرنی قیسقرتیریش، جریمه یاکه حتا جنایي جوابگرلیک کبی چاره‌لر قۉللنیشی ممکن.
«یورو نیوز»نینگ یازیشیچه، بو چاره‌لر اروپا اتفاقی‌نینگ مهاجرت سیاستی اوّلگیدن کۉره کۉپراق مأموري مسأله‌لردن قانونلرنی اجرا اېتیش و مهاجرلرنی قَیتریشگه یۉنه‌له‌یاتگنینی کۉرسه‌ته‌دی.
بو قرار اروپا اتفاقی نینگ مهاجرت بۉییچه کمیساری ماگنوس بروننېر سپتمبر آییده منیخ بۉلیب اۉتگن ییغیلیشده سۉنگگی ایکّی ییل ایچیده مهاجرلرنینگ اتفاققه ناقانوني کیریشی ۵۵ فایزگه کمه‌یگنینی ایتگنیدن کېین قبول قیلیندی.
اونینگ قۉشیمچه قیلیشیچه، شونگه قره‌مه‌ی، عملده قَیتریله‌یاتگن شخصلر سانی همان پستلیگیچه قالماقده.
اروپا اتفاقیگه اعضا دولتلر ۲۰۲۵ -ییلده قریب ۴۹۲ مینگ کیشیگه قَیتیش و اتفاق حدودینی ترک اېتیش تۉغریسیده قرار چیقرگن، بیراق عملده اتیگی ۱۳۵ مینگ کیشی قَیتریلگن.
