۷- اکتوبر هجوملری‌نینگ اوچینچی ییللیگی بیلن بیر وقتده اسرایل غزه سکتوریده ینگی هجوملرنی عملگه آشیردی. فلسطین رسميلریگه کۉره، بو هجوملرده اوچ کیشی هلاک بۉلگن.
حماس کوچلری ۲۰۲۳-ییل ۷-اکتوبر کونی اسرایل جَنوبیگه هجوم قیلگن اېدی. اسرایل معلوماتلریگه کۉره، بو هجوم نتیجه‌سیده ۳۰۰ دن آرتیق ایسرایللیک هلاک بۉلگن. اسرایل اوشبو هجومدن سۉنگ غزه سکتورینی بامباردمان قیلیشنی باشله‌دی و حاضرگچه بو حدودده ۷۴ مینگدن آرتیق کیشی هلاک بۉلگن.
فرانس پرس خبریگه کۉره، چهارشنبه کونی ۷-اکتوبر هجوملریده هلاک بۉلگنلرنینگ عایله اعضالری «نوا» موسیقی فستیوالی اۉتکزیلگن جایده تۉپلنگن بیر پیتده، چېگره‌‌نینگ نریگی تامانیده‌گی غزه‌دن کوچلی پارتلشلر آوازی اېشیتیلگن.
غزه شهریده‌گی الشَفا شفاخانه‌سی اسرایل‌نینگ تون دوامیده اویوشتیرگن هجومی عاقبتیده ایکّی کیشی هلاک بۉلگنینی معلوم قیلدی.
غزه مدنی مدافعه‌سی تشکیلاتی هلاک بۉلگنلردن بیری‌نینگ محمد تماس اېکنینی معلوم قیلدی. تشکیلات‌نینگ ایتیشیچه، او حماس نظارتیده‌گی حدودلرده فوق العاده قوتقروو و یاردم خدمتلرینی کۉرسه‌تووچی اوشبو تشکیلات‌نینگ کۉنگیللیسی بۉلگن.
غزه‌نینگ جَنوبیده‌گی خان یونیس شهریده ناصر شفاخانه‌سی ۶۰ یاشلی حسهام ابراهیم ابو مصطفی اسرایل هجومیده هلاک بۉلگنینی، ینه بیر نېچه کیشی یره‌لنگنینی معلوم قیلدی.
فرانس پرس اسرایل اوردوسیدن اوشبو هجوملر یوزه‌سیدن ایضاح سۉره‌گن.
غزه‌ده‌گی اوروش باشلنگنی‌نینگ اوچینچی ییللیگیده، امریکا واسطه‌چیلیگیده توزیلگن و ۲۰۲۵-ییل اکتوبریده کوچگه کیرگن صلحگه قره‌مه‌ی، فلسطین‌نینگ اوشبو ساحل‌بۉیی حدودیده یشش شرایطی هنوز نهایتده آغیر.
غزه شهریده یشاوچی محمود ابو حصیرهدشونده‌ی دېدی: «اوچ ییل دوام اېتگن قمل، قیرغین و ویرانه‌گرچیلیکدن سۉنگ اسرایل غزه سکتورینی یشب بۉلمه‌یدیگن جایگه ایلنتیردی.»
یوز مینگلب کۉچیریلگن آدملر هنوز چادر شهرچه‌لری و وقتینچه‌لیک باش‌پناه‌لرده یشه‌ماقده. اوشبو کمپلر دېنگیز ساحللری بۉیلب یاکه بامباردمان قیلینگن تورر جای بنالری‌نینگ ویرانه‌لری یانیده تشکیل اېتیلگن.
غزهدشِمالیده‌گی بیت‌حانون شهریده یشاوچی ناصر شونده‌ی دېدی: «بیر پیتلر بیزنینگ اوییمیز بار اېدی، اما حاضر یقینلریمیزدن اَیریلدیک؛ اولر نینگ جسدلری حلی هم ویرانه‌لر آستیده یاتیبدی.»
صلح اۉرنه‌تیلگچ، اسرایل غزه‌گه گومانیتار یاردم آلیب کیرووچی یوک مو‌ترلریگه قۉییلگن چېکلاولرنی یومشه‌تگن بۉلسه-ده، غزا شهریده یشاوچی احمد ناصر فرانس پرسگه حیات هنوز جوده آغیر اېکنینی ایتدی.
او شونده‌ی دېدی: «اوروش و آچرچیلیک بیزنی آچ، قۉرقیب یشه‌یدیگن و باش‌پناه‌سیز آدملرگه ایلنتیردی؛ چادرلرده یشه‌یه‌پمیز و نرخلرنینگ کېسکین آشیب کېتیشی بیلن کوره‌شیه‌پمیز.»
حماس نظارتیده‌گی غزه ساغلیقنی سقلش وزیرلیگی معلوماتلریگه کۉره، اسرایل‌نینگ حربي هجوملری غزا اهالیسی نینگ دېیرلی برچه‌سینی اۉز اویلرینی ترک اېتیشگه مجبور قیلگن و ۷۴ مینگ ۲۰۰دن آرتیق کیشی‌نینگ اۉلیمیگه سبب بۉلگن. بیرلشگن ملتلر تشکیلاتی اوشبو وزیرلیک تامانیدن اعلان قیلینه‌دیگن رقملرنی ایشانچلی دېب حسابله‌یدی.
مذکور وزیرلیک‌نینگ بیلدیریشیچه، اۉتگن ییل اکتوبر آییده صلح اعلان قیلینگنیدن بویان اسرایل کوچلری غزه‌ده ۱ مینگ ۴۶۰ دن آرتیق کیشینی اۉلدیرگن.
