«افغانستان آزادلیک جبهه‌سی» کامدیش اولسواللیگیده طالبلرنینگ اۉز کوچلری موضعلریگه اویوشتیرگن هجومی قَیتریلگنینی و ایکّی تامان اۉرته‌سیده‌گی تۉقنه‌شوو قریب آلتی ساعت دوام اېتگنینی معلوم قیلدی.
اوشبو جبهه‌گه کۉره، طالبلر کوچلری بوگون اېرته‌لب (چهارشنبه، ۱۵ میزان) نورستان‌نینگ کامدیش تومنیده‌گی اۉز کوچلری موضعلریگه بیر نېچه یۉنه‌لیشدن هجوم قیلگن. بیراق اولر «قطعي مدافعه» و «قرشی هجوم»گه دوچ کېلیب، آرتگه چېکینیشگه مجبور بۉلگن.
«افغانستان آزادلیک جبهه‌سی» نینگ دعوا قیلیشیچه، تۉقنه‌شوو دوامیده طالبلرنینگ ۱۱ اعضاسی هلاک بۉلگن، سکّیز نفری یره‌لنگن و اولر کامدیش اولسواللیگی همده نورستان مرکزی پارون شهریده‌گی شفاخانه و طبیات مرکزلریگه آلیب کېتیلگن.
اوشبو جبهه‌گه کۉره، اونینگ کوچلری «کامدیش اولسواللیگی‌نینگ آزاد قیلینگن حدودلریده‌گی استحکاملریده فعال و کوچلی اشتراک اېتماقده همده قیشلاقلر و اطرافده‌گی حدودلرده‌گی وضعیت اوستیدن تۉلیق نظارتگه اېگه».
طالبلر حاضرگچه اوشبو تۉقنه‌شوونی تصدیقله‌مه‌گن.
«افغانستان آزادلیک جبهه‌سی» کوچلری و طالبلر تخمیناً بیر هفته اوّل هم نورستان‌نینگ کامدیش اولسواللیگیده تۉقنه‌شگن اېدی. اۉشنده «آزادلیک جبهه‌سی» ۳۷ کیشی طالبلر اعضاسی هلاک بۉلگنینی، ۲۴ نفری یره‌لنگنینی همده اَیریم حدودلر و نظارت-اۉتکزیش پونکتلری اونینگ کوچلری تامانیدن اېگه‌للنگنینی معلوم قیلگن.
بیراق طالبلر مدافعه وزیرلیگی اوشبو تۉقنه‌شووده ۴۱ نفر مخالف کوچلر اعضاسی اۉز کوچلری تامانیدن اۉلدیریلگنی و ینه ۶۲ نفری تیریکله‌یین قۉلگه آلینگنینی بیلدیرگن.
طالبلر مدافعه وزیرلیگی هجومده اشتراک اېتگن شخصلرنی «فتنه‌چیلر، یاووزلیک و بوزغونچیلیک طرفدارلری همده داعش» دېب اته‌ب، اولر پاکستان حربي رېجیمی کۉمه‌گیده نورستان‌نینگ کامدیش اولسواللیگیگه کیریب کېلگنینی معلوم قیلگن.
