«اطلاعات روز» گزیته‌سیگه یېتیب کېلگن حجتلر شونی کۉرسه‌ته‌دیکی، طالبلر کابلده‌گی «عمر گُلستان شهرچه‌سی»نی «امیرلیک ملکی» دېب اعلان قیلگنیدن سۉنگ، اوشبو شهرچه‌ده‌گی هر بیر خاندان اوچون آییگه ایکّی مینگ افغاني «خدمت حقی» و هر بیر خانه اوچون بېش مینگ افغاني «اجاره حقی» طلب قیلماقده.
«عمر گُلستان شهرچه‌سی» کابل شهری نینگ ۹-ناحیه‌‌سیده‌گی ۳- مکرویان جایلشگن بۉلیب، اونده ۶۸۰ ته عایله ۱۰ و ۱۲ قبتلی، یشش و سودا اوچون مۉلجللنگن سکّیزته بلاکده استقامت قیله‌دی.
طالبلر عدلیه وزیرلیگی ۱۴۰۴-ییل نینگ ۱ض-حوت سنه‌سیده مرکزي حدودده‌گی «امیرلیک تامانیدن اېگه‌للب آلینگن یېرلر بۉییچه ایشلرنی کۉریب چیقیش مخصوص محکمه‌سی» حجت و دلیللرنی اۉرگنیب، اوشبو شهرچه‌‌نینگ جمعی ۱۱ جېریب یېرینی «امیرلیک ملکی» صفتیده بېلگیله‌گنینی معلوم قیلگن.
حاضر اوی-جای و ملکلریگه اېگه‌لیک حقوقیدن اَیریلگن شهرچه اهالیسی طالبلر حتا اۉز قانونلریگه هم عمل قیلمه‌یاتگنینی اَیتماقده. اولرنینگ تأکیدلشیچه، طالبلذ اۉز رهبری تامانیدن تصدیقلنگن قانونلرگه و محکمه نینگ مجبوريتلریگه ضد روشده، اهالیدن جوده یوقاری مقدارده خدمت حقی و اجاره پولی طلب قیلماقده.
حجتلرگه کۉره، جاري ییل نینگ سنبله آییده طالبلر نظارتیده‌گی «عمر گُلستان شهرچه‌سینی سقلش و نظارت قیلیش اداره‌سی» شهرچه‌ده‌گی هر بیر خاندان اوچون ایکّی مینگ افغاني مقداریده «خدمت حقی» اوندیرماقده.
محلي اهالی‌نینگ بیر کیشی اوّل اولر خصوصي پودرتچی کمپنیگه هر آی ۱ ۲۰۰افغاني تواگنینی، طالبلر اېسه بو خرجتنی آشیرگنینی ایتدی.
طالبلر رهبری تامانیدن تصدیقلنگن «یېرلرنی اېگه‌للب آلیش‌نینگ آلدینی آلیش و اېگه‌للب آلینگن یېرلرنی قَیتریش تۉغریسیده‌گی قانون» نینگ ۱۵-مادّه‌سی ۴-بندیده عملده‌گی ملک اېگه‌لری ملک قیمتینی تۉله‌ش آرقه‌لی اونگه اېگه‌لیک قیلیشی ممکنلیگی انیق بېلگیلنگن.
«عمر گُلستان شهرچه‌سی» اهالیسی طالبلر اۉز رهبری تامانیدن تصدیقلنگن قانون و فرمانلرگه ضد روشده اوشبو ملکلرنی ساتیشگه راضی بۉلمه‌یاتگنیدن شکایت قیلماقده. اولر نینگ ایتیشیچه، طالبان «امیرلیک ملکی» دېب بېلگیله‌گن اوی و یېرلرنی درآمد منبعیگه ایلنتیرگن.
شهرچه اهالیسیدن بیری «اطلاعات روز» گزیته‌سیگه ایتیشیچه، اولرنینگ اویلری «امیرلیک ملکی» دېب اعلان قیلینگنیدن سۉنگ، اولر طالبلر عالي محکمه‌گه هم مراجعت قیلگن.
طالبلر عالي محکمه‌سی‌نینگ ۱۴۰۵-ییل سرطان آیی‌نینگ ۱۱-کونیده چیقریلگن حکمیده «امیرلیک تامانیدن اېگه‌للب آلینگن یېرلرنی اېگه‌للش‌نینگ آلدینی آلیش و قَیتریش کمیسیونسی»گه «عمر گُلستان شهرچه‌سی» اهالیسی شکایتینی «یېرلرنی اېگه‌للب آلیش‌نینگ آلدینی آلیش و اېگه‌للب آلینگن یېرلرنی قَیتریش تۉغریسیده‌گی قانون» نینگ ۱۵-مادّه‌سی ۴-بندیگه موافق کۉریب چیقیش تاپشیریلگن.
اوشبو قانونگه کۉره، عملده‌گی ملک اېگه‌لری ملک قیمتینی تۉله‌ش آرقه‌لی اۉز جاییده قالیشی و ملک‌نینگ شرعي اېگه‌سیگه ایلنیشی ممکن.
بیراق منبع‌نینگ ایتیشیچه، حاضر طالبلر عدلیه وزیرلیگی قانون و اوشبو گروه عالي محکمه‌نینگ حکمینی اعتبارسیز قالدیریب، «عمر گُلستان شهرچه‌سی»ده‌گی برچه اهالیگه هر بیر یشش خانه‌سی اوچون آییگه بېش مینگ افغاني مقداریده «اجاره حقی» تۉله‌شنی طلب قیلگن.
اجاره حقینی تۉله‌ش بۉییچه حلی رسمي حکم چیقریلمه‌گن بۉلسه-ده، اویلر نینگ اجاره نرخلری بېلگیلنگن و اهالیگه آغزه‌کی روشده معلوم قیلینگن.
منبع‌نینگ ایتیشیچه، شو اساسده طالبلر بېش خانه‌لی اویلر اوچون آییگه ۲۵ مینگ افغاني، تۉرت خانه‌لی اویلر اوچون اېسه آییگه ۲۰مینگ افغاني اجاره حقی بېلگیله‌گن.
شهرچه اهالیسی‌نینگ ایتیشیچه، طالبان رهبری‌نینگ ملک قیمتی تۉله‌نگن تقدیرده عملده‌گی اېگه‌لر نینگ چیقریب یوباریلمسلیگی حقیده‌گی فرمانی انیق بۉلیشیگه قره‌مه‌ی، حاضرگچه ۳۰ ته عایله مجبورن چیقریب یوباریلگن و طالبلر اۉز آدملرینی اولرنینگ اویلریگه جایلشتیرگن.
«عمر گُلستان شهرچه‌سی» اهالیسیدن بیری طالبلر شونده‌ی مناسبت قیلگنکی، حاضر «آدملر قماققه توشیب قالیشدن قۉرقیب، ناراضیلیک بیلدیریشگه جرعت اېته آلمه‌یدی»، دېدی. اونینگ ایتیشیچه، امیرلیک ملکی دېب بېلگیلنگن کۉچمس ملک ایشلری بیلن شغللنووچی طالبلر منصبدارلری عملده‌گی ملک اېگه‌لرینی «امیرلمومنین نینگ فرمانیگه کۉره، هېچ کیم بیزدن بو مسأله بۉییچه حساب سۉره‌شگه حقلی اېمس»، دېب آگاهلنتیرگن.
«عمر گُلستان شهرچه‌سی» اهالیسی حاضر قندهاردن کابلگه هیئت یوباریلیشینی طلب قیلماقده. اولر هېچ بۉلمه‌گنده طالبلر رهبری‌نینگ فرمانیگه موافق، اویلری‌نینگ قیمتینی قیته‌دن اوشبو گروهگه تۉله‌شگه تیار بۉلگن فقرالر مجبورن چیقریب یوباریلمسلیگینی همده خدمت حقلری اۉزباشیمچه‌لیک بیلن آشیریلمسلیگینی ایسته‌ماقده.
