احمد صبور ۳۹ یاشده، فاریاب ولایتی‌نینگ پشتونکوت اولسواللیگیده یشه‌گن. او تخمیناً ایکّی هفته آلدین ایرانگه کیریشگه اورینگن وقتیده ایران چېگره قۉریقچیلری تامانیدن حبسگه آلینیب، قتّيق کلتکلنگن اېدی. صبور بوگون مزار شریفده‌گی شفاخانه‌لردن بیریده وفات اېتدی.
صبورگه یقین منبعلرنینگ ایتیشیچه، او تخمیناً ایکّی هفته آلدین ایرانگه باریش مقصدیده افغانستاندن چیقیب کېتگن. منبعلرگه کۉره، صبور ایران چېگره‌سیگه یېتیب کېلگنیدن سۉنگ بو مملکت چېگره قۉریقچیلری تامانیدن حبسگه آلینگن و حبس وقتیده قتّيق کلتکلنگن. نتیجه‌ده اونینگ بدنی جدّي جراحتلنگن.
شوندن سۉنگ بیر گروه افغانلر صبورنی دوالنیش اوچون دستلب نیمروزده‌گی شفاخانه‌لردن بیریگه آلیب بارگن. او نیمروزده دوالنگنیدن سۉنگ طبي یاردمنی دوام اېتتیریش اوچون اوّل میمنه‌گه، کېین اېسه مزار شریفگه کۉچیریلگن.
بیراق منبعلر اونینگ ساغلیغی یخشیلنمه‌گنینی و صبور بوگون مزار شریفده‌گی شفاخانه‌لردن بیریده وفات اېتگنینی اَیتماقده.
احمد صبور بوندن آلدین افغانستان ملي اوردوسی صفیده خدمت قیلگن. منبعلرگه کۉره، او حربي خدمت دوریده امریکا تامانیدن حربي تیارگرلیکدن اۉتیش اوچون اردن‌گه یوباریلگن.
صبور طالبلر حاکمیتگه کېلگنیدن سۉنگ خوفسیزلیک خواطرلری سبب افغانستاننی ترک اېتیب، ابرانگه باش‌پناه اوچون کېتگن اېدی. او تخمیناً بیر ییل اوّل ایراندن مجبورن دېپورت قیلینگن.
صبور عایله‌سیگه یقین منبعلرنینگ ایتیشیچه، او حربي فعالیتی و خوفسیزلیک بیلن باغلیق خواطرلر سبب افغانستانگه قَیتگنیدن کېین عادتده‌گی و خوفسیز حیات کېچیره آلمه‌گن. شو باعث او آخر-عاقبت ینه ایرانگه باریشگه حرکت قیلگن.
