بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) طالبلر تامانیدن عیاللر و قیزلرنینگ کيینیش طرزیگه سبب حبسگه آلینه‌یاتگنیدن جدّي خواطر بیلدیردی.
اوشبو اداره بوگون (پنج‌شنبه، ۱۶ میزان) نشر قیلگن بیاناتیده ایتیشیچه، ۲۰۲۶-ییل جولای و سپتمبر آیلری آره‌لیغیده هرات و کابلده کمیده ۵۲ نفر عیال و بیر کیشی قیز حبسگه آلینگن یاکه وقتینچه اوشلب توریلگن. شونینگدېک، ینه بیر قطار عیاللر حبسگه آلینیشی بیلن تهدید قیلینگن.
یونامانینگ معلوماتیگه کۉره، حمایه بیلن باغلیق خواطرلر و اجتماعي تمغه‌لنیش سببلی خبر قیلینمه‌گن حالتلر هم موجود بۉلیب، بونده‌ی حالتلر نینگ حقیقي سانی بوندن انچه کۉپ بۉلیشی ممکن.
یونامانینگ قۉشیمچه قیلیشیچه، طالبلر عیاللر و قیزلرنی اوشبو گروه تامانیدن قبول قیلینگن کيینیش طلبلرینی بوزگنلیکلری سببلی حبسگه آلگن.
یوناما بیاناتیده شونده‌ی دېییله‌دی: «عیاللر چه‌دار کيمه‌گنی، ساچلری کۉرینیب تورگنی، رنگ-برنگ رۉمال اۉره‌گنی یاکه پرداز قیلگنی، شونینگدېک، محرمسیز جماعت جایلریده بۉلگنی اوچون حبسگه آلینگن. اوشبو عیاللر بیر نېچه ساعت اوشلب توریلگچ، آزاد قیلینگن.»
بیرلشگن ملتلر تشکیلاتی اداره‌سی، شونینگدېک، عیاللرگه، جمله‌دن، عیال دوکاندارلرگه نسبتاً آغزه‌کی حقارت، کلتکلش و تهدید قیلیش کبی حالتلردن خواطر بیلدیرگن.
یوناما ینه بیر بار تأکیدله‌گنیچه، بونده‌ی چاره‌لر عیاللر و قیزلرنینگ اېرکین حرکتلنیش، فکر بیلدیریش و شخصي مستقللیک حقوقلرینی بوزه‌دی.
اوشبو تشکیلات‌نینگ قید اېتیشیچه، حبسگه آلیش و اوشلب توریش حالتلری عیاللر و قیزلرنی ینه‌ده کوچلی اجتماعي تمغه‌لنیش و جمعیتدن چېتله‌تیلیش خوفیگه دچار قیله‌دی.
یوناما طالباننی عیاللر و قیزلرگه نسبتاً کمسیتووچی عملیاتلرگه برهم بېریشگه، برچه فقرالر نینگ انسان حقوقلری و قدر-قیمتینی حرمت قیلیشنی کفالتلشگه همده افغانستان نینگ خلق‌ارا انسان حقوقلری قانونلری دایره‌سیده‌گی مجبوریتلریگه رعایه قیلیشگه چقیرگن.
طالبلر عیاللر و قیزلرگه نسبتاً قتّيق چېکلاولر جاري قیلگن. حاضرده افغانستانده عیاللر و قیزلر تعلیم آلیش و ایشلش امکانیتیدن محروم.
اوشبو گروه عیاللرنینگ یوزینی تۉلیق یاپیب یوریشینی مجبوري دېب اعلان قیلگن و بو طلبگه بۉیسونمه‌گن عیاللر همده یاش قیزلرنی حبسگه آلیب، قماققه تشله‌ماقده.
عیاللر و قیزلرنینگ حبسگه آلینیشی یوزه‌سیدن کېنگ ترقه‌لگن تنقید و ناراضیلیکلرگه قره‌مه‌ی، طالبلر بو عملیاتلرینی دوام اېتتیرماقده.
