«روند سبز» نینگ پنجشرده اوشبو حرکت کوچلری تامانیدن بیر تیک اوچر اوریب توشیریلگنی حقیده‌گی دعواسیگه مناسبت بیلدیرر اېکن، طالبلرنینگ پنجشرده‌گی ولایت حاکمی مطبوعات سوزلاوچیسی سیف‌الدین لوتون تیک اوچر قۉنیش اوچون ناقوله‌ی جاینی تنله‌گنی سببلی تاشگه اوریلیب، آز‌گینه ضرر کۉرگنینی ایتگن.
«طلوع نیوز» خبریگه کۉره، سیف‌الدین لوتون پنجشرده تیک اوچر بیلن باغلیق هېچ قنده‌ی خوفسیزلیک حادثه‌سی یوز بېرمه‌گنینی بیلدیرگن.
او اوشبو تیک اوچر بیلن عیناً نیمه صادر بۉلگنی حقیده باتفصیل معلومات بېرمه‌گن.
«روند سبز» نینگ حربي قناتی — پنجشرده طالبلرگه تېگیشلی بیر تیک اوچرنی اۉز کوچلری اوریب توشیرگنینی دعوا قیلگن.
«روندسبز» ایکس‌ده‌گی بیاناتیده اوشبو تیک اوچر کېچه، چهارشنبه کونی (۱۵میزان) اېرته‌لب ساعت ۷: ۱۵ اطرافیده نشانگه آلینگنینی معلوم قیلگن.
«روندسبز» اوریب توشیریلگن تیک اوچر قالدیقلری آرزو دره‌سی حدودیده قالگنینی بیلدیرگن.
اوشبو بۉلینمه تیک اوچرنینگ ایکّی اوچووچیسی «عبدالعظیم» و «محمد نعیم» — آغیر یره‌لنگنینی و کابلده‌گی سردار محمد داوود خان نامیده‌گی ۴۰۰ ا‌ۉرینلی شفاخانه‌گه آلیب کېتیلگنینی دعوا قیلگن.
«روندسبز» نینگ ایتیشیچه، اوشبو تیک اوچر طالبلر هوا کوچلری باشلیغی ملا نقیب‌الله مقیمنی آلیب کېته‌یاتگن بۉلگن.
افغانستان‌نینگ سابق جمهور رئیس اۉرین‌باسری امرالله صالح رهبرلیگیده‌گی اوشبو حربي بۉلینمه اوریب توشیریلگن تیک اوچر جمهوریت حکومتی اوردوسیگه هندستان تامانیدن هدیه قیلینگن تیک اوچرلر ترکیبیگه کیرگنینی اَیتماقده.
پنجشرده‌گی محلي منبعلر آرزو دره‌سی اطرافیده تیک اوچر پست بلندلیکده اوچگنینی تصدیقله‌ماقده. بیراق اولر آدملر حدودنینگ تاغلی قِسمیگه یېتیب باریش امکانیگه اېگه اېمسلیگینی اَیتماقده.
