۲۰۲۶ـ ییلگی نوبل تینچلیک مکافاتی ساورینداری
جَنوبي افریقادن بۉلگن تنیقلی حقوقشناس و بیرلشگن ملتلر تشکیلاتینینگ انسان حقوقلری بۉییچه سابق عالي کمیساری «ناوانتم ناوی پیلای»، ۲۰۲۶-ییلگی نوبل تینچلیک مکافاتی ساورینداری بۉلدی.
ناروی نوبل کمیته‌سی بوگون (جمعه، ۱۷-میزان) اوشبو تنیقلی حقوقشناس تینچلیک و خلق‌ارا حقوقنی ترغیب قیلیش یۉلیده‌گی سعی-حرکتلری اوچون نوبل تینچلیک مکافاتیگه سزاوار بۉلگنینی اعلان قیلدی.
کمیته‌‌نینگ قۉشیمچه قیلیشیچه، «بو ییلگی لاوریات حربي جنایتلر، انسانیتگه قرشی جنایتلر و جینوساید اوچون جنایي جوابگرلیککه تارتیلیشنی تأمینلشده مهم رۉل اۉینه‌گن».
ناروی نوبل کمیته‌سی بو ییلگی لاوریات خلق‌ارا حقوق نینگ قمراوی و تأثیرینی سېزیلرلی درجه‌ده کېنگه‌یتیرگنینی تأکیدله‌دی.
کمیته، شونینگدېک، «ناوانتم ناوی پیلای» ملي یېتکچیلرنی اۉز خطی-حرکتلری اوچون جوابگرلیککه تارتگنی همده زۉرآورلیک و ماجرالر قربانلریگه امید به‌غایشله‌گنینی قید اېتدی.
ناروی نوبل کمیته‌سی نینگ تأکیدلشیچه، او اېگه‌لله‌گن برچه لوازملریده شخصلر و دولتلر نینگ قانون اوستوارلیگیگه رعایه قیلیش مسوولیتینی تأکیدلب کېلگن همده تېگیشلی حقوقي معیار و تمایللرنی بېلگیلش و ایشلب چیقیشگه حصه قۉشگن.
«ناوانتم ناوی پیلای»، جَنوبي افریقا عالي محکمه‌سیده، رواندا بۉییچه خلق‌ارا جنایي تریبونالی و خلق‌ارا جنایي محکمه‌ده قاضی صفتیده فعالیت یوریتگن.
او، شونینگدېک، ۲۰۰۸-ییلدن ۲۰۱۴-ییلگچه بیرلشگن ملتلر تشکیلاتینینگ انسان حقوقلری بۉییچه عالي کمیساری بۉلگن. یقین وقتگچه اېسه بیرلشگن ملتلر تشکیلاتینینگ باسیب آلینگن فلسطین حدودی بۉییچه مستقل خلق‌ارا تېرگاو کمیسیونسیگه رهبرلیک قیلگن.
«ناوانتم ناوی پیلای» حاضرده خلق‌ارا محکمه‌ده میانما جینوسایتیده عیبلنه‌یاتگن ایش بۉییچه قاضی صفتیده فعالیت یوریتماقده.
ناروی نوبل کمیته‌سی نوعی پیلّه‌ی خلق‌ارا محکمه‌لرنینگ تاریخي ایشلریده حقوقي چاره‌لر اوروش و زۉرآورلیک نینگ آلدینی آلیشگه یاردم بېریشی ممکنلیگینی کۉرسه‌تگنینی بیلدیردی. او خلق‌ارا حقوق انستیتوتلرینی مستحکملشگه هم حصه قۉشگن. اونینگ مستقللیگی، تجربه‌سی و قطعیتی نوعی «ناوانتم ناوی پیلای»، زمانه‌میزنینگ اېنگ حرمتلی خلق‌ارا حقوقشناسلریدن بیریگه ایلنتیرگن.
ناروی نوبل کمیته‌سی دنیانینگ تورلی حدودلریده‌گی ماجرالر و تۉقنه‌شوولرگه اشاره قیلیب، شونده‌ی دېدی: «بو ییلگی نوبل تینچلیک مکافاتینی تاپشیریش آرقه‌لی دنیاگه قانون اوستوارلیگی — ملي و خلق‌ارا درجه‌ده — تینچلیکنی تأمینلش و نزاعلرنی تینچ یۉل بیلن حل اېتیش اوچون یره‌تگن تیزیمیمیز نینگ پای‌دېواری اېکنینی اېسله‌تماقچیمیز. عدالتسیز تینچلیک بۉلیشی ممکن اېمس».
کمیته ینه شونده‌ی تأکیدله‌دی: ««ناوانتم ناوی پیلای» زمانه‌میزده‌گی خلق‌ارا حقوق تمایللری نینگ اېنگ بویوک حمایه‌چیلریدن بیریدیر. اونینگ یارقین فعالیتی گلابه‌ل مقیاسده قانون اوستوارلیگینی قۉللب-قوّتلش، مستحکملش و اونینگ قمراوینی کېنگه‌یتیریش ضرورلیگینی ینه بیر بار اېسله‌ته‌دی. «ناوانتم ناوی پیلای» نینگ عدالت و انسان قدر-قیمتیگه صداقتی ینه‌ده تینچ دنیا قوریشگه اینتیله‌یاتگن برچه انسانلر اوچون امید و الهام منبعیدیر».
اۉتگن ییلی وینزویلا حکومتیگه قرشی مخالفت یېتکچیسی مريا کارینا ماچه‌دا نابېل تینچلیک مکافاتیگه سزاوار بۉلگن اېدی.
تینچلیک مکافاتی شو هفته تاپشیریله‌یاتگن بېشینچی نوبل مکافاتیدیر. بونگچه ادبیات، کیمیا، فیزیک و طبیات یۉنه‌لیشلری بۉییچه نوبل مکافاتی ساوریندارلری اعلان قیلینگن.
