پاکستان باش وزیری‌نینگ اۉرین‌باسری و تشقی ایشلر وزیری اسحتق‌دار: «اگر طالبان رژیمی افغانستاندن توریب فعالیت یوریته‌یاتگن ترورچیلرگه قرشی چاره کۉرمسه، آخر-عاقبت اونینگ عاقبتلریگه اۉزی دوچ کېله‌دی»، دېیه آگاهلنتیردی.
جیو نیوز خبریگه کۉره، او اسلام آباد استراتژیک تدقیقاتلر انستیتوتی (آی‌اس‌اس‌آی) تامانیدن «پاکستان‌ده تروریزم نینگ اۉزگریب باره‌یاتگن منظره‌سی» موضوعسیده اۉتکزیلگن خلق‌ارا کنفراسده سۉزله‌گن نطقیده: «اگر افغانستان حکومتی ترورچیلرگه قرشی چاره کۉرمسه، بیر کون کېلیب اونینگ اۉزی هم بو نینگ عاقبتلریگه دوچ کېلیشگه مجبور بۉله‌دی»، دېدی.
پاکستان باش وزیری نینگ اۉرین‌باسری مملکتی افغانستان رسميلریدن قۉشنی دولتلرگه قرشی ترورچیلیک هجوملرینی عملگه آشیریش اوچون افغانستان حدودیدن فایده‌لنیشگه یۉل قۉیمسلیکنی بیر نېچه بار سۉره‌گنینی ایتدی.
او: «پاکستان نینگ افغانستاندن فقط بیرته طلبی بار: بو دولت اۉز توپراغیدن تروریزم اوچون فایده‌لنیشگه یۉل قۉیمسلیگی کېره‌ک»، دېدی.
پاکستان تشقی ایشلر وزیری تروریزم مسأله‌سیده طالبلر رسميلری بیلن مذاکره‌لر اۉتکزیلگنینی، بیراق اونینگ ایتیشیچه، طالبان تروریزمگه قرشی کوره‌ش باره‌سیده‌گی مجبوريتلرینی بجرمه‌گنینی بیلدیردی.
اسحاق‌دار افغانستانده پاکستان طالبان تحریک طالبان پاکستان (تی‌تی‌پی) و باشقه قوراللی گروهلر نینگ موجودلیگی منطقوي تینچلیککه تهدید ساله‌یاتگنینی تأکیدله‌دی. او افغانستان طالبانیدن ترورچیلرگه قورال-یراغ یېتکزیب بېریش و باشقه کۉرینیشده‌گی یاردملرنی زودلیک بیلن توخته‌تیشنی طلب قیلدی.
اسحاق‌دار تروریزم هنوز منطقه و دنیا اوچون اېنگ کتّه معما بۉلیب قاله‌یاتگنینی ایتیب، پاکستان جنگریلرگه قرشی کوره‌شده کتّه قربانلر بېرگنینی تأکیدله‌دی.
او: «پاکستان تروریزمگه قرشی اوروشده ۹۰ مینگدن آرتیق انسانینی یۉقاتدی»، دېدی و خلق‌ارا همجمعیتنی مملکت نینگ تلفاتلرینی تن آلیشگه چقیردی.
پاکستان رسميلری طالبلر ۲۰۲۱-ییلده حاکمیتگه قَیتگنیدن بېری، اینیقسه خیبر پختونخوا و بلوجستان ایالت لری، چېگره‌لر ارا ترورچیلیک هجوملری سېزیلرلی درجه‌ده کۉپه‌یگنینی اَیتماقده.
پاکستان ۲۰۲۶-ییل سپتمبر آییده سۉنگگی ۱۲ ییل ایچیده‌گی بیر آی دوامیده صادر بۉلگن جنگری هجوملر نینگ اېنگ یوقاری کۉرسه‌تکیچینی قید اېتدی.
پاکستان ماجرالر و خوفسیزلیکنی اۉرگنیش انستیتوتی (PICSS) تامانیدن تۉپلنگن معلوماتلرگه کۉره، سپتمبر آییده مملکت بۉیلب ۲۲۵ ته جنگری هجوم قید اېتیلگن. اگوست آییده اېسه بو کۉرستکیچ ۱۹۹ته بۉلگن.
بو کۉرستکیچ هجوملر سانی ۱۳ فایزگه آشگنینی کۉرسه‌ته‌دی. جنگریلر هجوملری سانی کېتمه-کېت اوچینچی آیده هم کۉپه‌یگن.
پاکستان رسميلری بیر نېچه بار پاکستان حدودیده‌گی گروهلر افغانستان حدودیدن فایده‌لنه‌یاتگنینی ایتگن، بیراق طالبان بو دعوالرنی رد اېتماقده.
طالبان مطبوعات سوزلاوچیسی ذبیح‌الله مجاهد بوگون نشر قیلگن پیامیده پاکستان اۉزی‌نینگ ایچکی معمالرینی حل قیلیش اوچون بو گروهنی عیبدار قیلمسلیگی، عکسینچه، اۉز خلقی نینگ فکری و حقوقلرینی حرمت قیلیشی کېره‌کلیگینی ایتدی.
او: «اۉز موفقیتسیزلیکلریده افغانستاننی عیبلش پاکستان رسميلری اوچون هېچ قنده‌ی معما نینگ یېچیمی اېمس. پاکستانده‌گی سیاسي، خوفسیزلیک، اجتماعي و اقتصادي معمالر تشویش اویغاتماقده و بوتون منطقه اوچون سلبي عاقبتلرگه آلیب کېلماقده»، دېدی.
