ایران تشقی ایشلر وزیرلیگی‌نینگ مطبوعات سوزلاوچیسی اسماعیل بقایی ایران حدودیده‌گی چابهار بندریده افغانستانگه سرمایه کیریتیش اوچون ۱۱۰ هکتار یېر اجره‌تیلگنی حقیده‌گی خبرلرنی رد اېتدی. او بو مسأله ایران پارلمانی وکیللریدن بیری‌نینگ بیاناتیدن کېلیب چیققن «انیق توشونماوچیلیک» اېکنینی ایتدی.
بقایی بوگون (دوشنبه، ۲۰-مبزان) هفته‌لیک مطبوعات انجمنیده «یېر و حدودنی تاپشیریش مطلقا ممکن اېمسلیگی انیق» اېکنینی تأکیدله‌دی.
اونینگ قۉشیمچه قیلیشیچه، افغانستانگه «یېر اجاره‌گه بېریش» مسأله‌سی رسماً محاکمه قیلینمه‌گن. بلکه بو موضوع رسمي اوچره‌شوولردن بیری‌نینگ چېتیده، ایران وزیرلریدن بیری‌نینگ افغانستانگه سفری چاغیده کۉتریلگن و ایران تامانی بو مسأله‌نی کۉریب چیقیشینی بیلدیرگن.
ایران تشقی ایشلر وزیرلیگی مطبوعات سوزلاوچیسی «حدودنی تاپشیریش و شو کبی مسأله‌لر حقیده بیلدیریلگن بحث-مناظره‌لر نینگ هېچ بیری هېچ قنده‌ی اساسگه اېگه اېمس»لیگینی تأکیدله‌دی.
اوّلراق ایران پارلمانی‌نینگ ایشلب چیقریشنی قۉللب-قوّتلش بۉییچه مخصوص کمیسیونی رئیسی محسن زنگنه چابهار بندری‌نینگ مخصوص اقتصادي حدودیده افغانستانگه ۱۱۰ هکتار یېر اجره‌تیش بۉییچه طالبلر بیلن دستلبکی کېلیشووگه اېریشیلگنینی ایتگن اېدی.
او کابل‌گه قیلگن سفریدن سۉنگ «سحر» ترماغیگه بېرگن صحبتیده بو کېلیشوو طالبلرنینگ صناعت و سودا وزیری بیلن ترانزیتده‌گی تۉسیقلرنی برطرف اېتیش، افغانستان‌نینگ آچیق دېنگیزلرگه تۉغریدن-تۉغری چیقیشینی آسانلشتیریش همده افغان سوداگرلری‌نینگ سودا و سرمایه‌وي فعالیتی اوچون شرایط یره‌تیش مقصدیده عملگه آشیریلگنینی ایتگن.
اوشبو بیاناتلر ایرانده کېنگ کۉلملی مناسبتلرگه سبب بۉلدی و اَیریملر بونی افغانستانگه «ایران حدودی نینگ تاپشیریلیشی» دېب بهاله‌دی.
