اسلام همکارلیک تشکیلاتی باش کاتبی نینگ افغانستان بۉییچه مخصوص وکیلی طارق علی بخیت کابلده طالبلر رسميلری بیلن اوچره‌شوولرده قیزلر نینگ تعلیم آلیش حقوقیگه و اولر نینگ طبیات یۉنه‌لیشیده تحصیل آلیشی اوچون شرایط یره‌تیش ضرورلیگیگه اورغو بېردی.
اسلام همکارلیک تشکیلاتی بیاناتیگه کۉره، طارق علی بخیت طالبان نینگ ساغلیقنی سقلش وزیری نور جلال جلالی بیلن اوچره‌شوویده طبي خدمتلر کۉرسه‌تیشده عیال خادملرنینگ اشتراکی حیاتي اهمیتگه اېگه اېکنینی تأکیدله‌گن.
طالبلر حاکمیتگه قَیتگنیدن سۉنگ قیزلر نینگ تعلیم آلیشی و اۉقیشی تعقیقلنگن. بو تعقیق نینگ عاقبتلریدن بیری عیال شفاکارلر یېتیشماوچیلیگیدیر. بیرلشگن ملتلر تشکیلاتی‌نینگ معلوماتلریگه کۉره، بو معما حاضرده انقراضگه ایلنگن. شونگه قره‌مه‌ی، قیزلر نینگ تعلیم آلیشیدن محروم اېتیله‌یاتگنی یوزه‌سیدن خلق‌ارا تنقیدلرگه قره‌مه‌سدن، طالبلر حاضرگچه اۉز موضعیدن چېکینمه‌گن.
اسلام همکارلیک تشکیلاتی وکیلی، شونینگدېک، طالبلر نینگ تعلیم وزیری حبیب‌الله آغه بیلن اۉقوو دستوری مسأله‌سیده مذاکره آلیب بارگن. اوچره‌شووده قیزلرنینگ تعلیم آلیش حقوقیگه اورغو بېریش همده اسلام همکارلیک تشکیلاتی تامانیدن افغانستان تعلیم ساحه‌سینی رواجلنتیریش اوچون تکلیف اېتیلگن بیر قطار لایحه‌لرنی کۉریب چیقیش مسأله‌لری محاکمه قیلینگن.
حاضرده طالبلر نظارتی آستیده‌گی افغانستان قیزلر و عیاللرنینگ تعلیم آلیشی همده ایشلشیگه تۉسقینلیک قیله‌یاتگن دنیاده‌گی یگانه دولتدیر.
اسلام همکارلیک تشکیلاتی و باشقه بیر قطار اسلامي تشکیلاتلر بو چېکلاولرنی بیر نېچه بار تنقید قیلیب، اولرنی بېکار قیلیشگه چقیرگن. بیراق طالبان حاضرگچه بو تنقیدلرگه اعتبار قره‌تمه‌گن.
اسلام‌آبادده بۉلیب اۉتگن اسلام همکارلیک تشکیلاتی ییغیلیشی رېزالیوتسيه‌سیده اشتراکچیلر افغانستانده قیزلر نینگ تعلیم آلیشی و عیاللر اوچون ایش امکانیتلری نینگ توخته‌تیلگنیدن «چوقور افسوس» بیلدیرگن. اولر بو چاره اسلام نینگ آبروسیگه پوتور یېتکزه‌یاتگنینی تأکیدله‌گن.
