سران افغانستان، ایران و تاجیکستان بر تقویت همکاری‌های سه‌جانبه تأکید کردند

اطلاعات روز: رییسان جمهوری افغانستان، تاجیکستان و ایران پس از پایان جشن نوروز در یک نشست سه‌جانبه در ارگ ریاست جمهوری بر گسترش‌ همکارهای سیاسی، امنیتی، اقتصادی و فرهنگی تأکید کردند. دفتر رسانه‌های ریاست جمهوری دیروز با نشر خبرنامه‌‌ای اعلام کرد که رییسان جمهوری کشورهای یاد شده بر تقویت هم‌کاری‌های سه‌جانبه در عرصه‌های سیاسی، اقتصادی، فرهنگی و امنیتی تأکید کردند.
بر‌اساس خبرنامه‌، حامد کرزی، داکتر حسن روحانی، رییس جمهوری ایران و امام علی رحمان، رییس جمهوری تاجیکستان پیوندهای تاریخی و فرهنگی میان سه کشور را در راستای تحقق اهداف مشترک‌شان با‌اهمیت دانستند. هم‌چنان در خبرنامه آمده است، رییسان جمهوری ایران و تاجیکستان صلح، ثبات و امنیت در افغانستان را برای ثبات منطقه و جهان با اهمیت خوانده‌اند.
رییسان جمهور دو کشور یاد شده حمایت‌شان را از روند صلح افغانستان در چارچوب منافع ملی و قانون اساسی کشور تحت رهبری خود افغان‌ها و انتقال مسئولیت‌های امنیتی از نیروهای بین‌المللی به نیروهای امنیتی کشور اعلام کردند. رییسان جمهور ایران و تاجیکستان برگزاری انتخابات پیش‌رو را گام مهم در راستای تقویت دموکراسی و تحکیم ثبات سیاسی در کشور دانسته‌اند.
در خبرنامه‌ی ریاست جمهوری آمده است، رییسان جمهوری افغانستان، ایران و تاجیکستان در این نشست حمایت‌شان را از ادامه‌‌ی و تقویت هم‌کاری‌های مشترک در راستای مبارزه با تروریزم، جرایم سازمان یافته و مواد مخدر که تهدید جدی برای سه کشور و منطقه محسوب شده‌اند، اعلام کردند.
رییسان جمهوری سه کشور‌ موقعیت جغرافیایی‌شان را در توسعه و گسترش مناسبات اقتصادی، تجارتی، فرهنگی و ترانزیت، ثبات و تقویت اعتماد متقابل میان کشورهای منطقه با اهمیت دانسته‌اند. آنان هم‌چنان آمادگی‌های‌شان را برای اجرای طرح‌های مشترک زیربنایی، ساخت جاده‌ها، اتصال راه‌‌ آهن، انتقال انرژی، آب، تجارت، ترانزیت و شبکه‌های مخابرات اعلام کرده‌اند.
در خبرنامه‌ی ریاست جمهوری آمده است که سران سه کشور بر ساخت راه آهن‌ افغانستان از شیرخان بندر و وصل آن از طریق هرات به ایران و هم‌چنان انتقال نیروی برق از تاجیکستان به ایران از طریق افغانستان، تأکید کرده‌اند. براساس خبرنامه، آنان هم‌چنان از گسترش هم‌کاری‌های سه‌جانبه در بخش‌های فرهنگی، علمی و آموزشی میان سه کشور نیز حمایت‌شان را علام کرده‌اند.
در خبرنامه‌ی ریاست جمهوری تأکید شده است، برای اجرای توافقات رییسان جمهوری سه کشور موافقت شد که نشست شورای مشترک هم‌آهنگ کنندگان ملی در سطح معاونان وزیران خارجه‌ی کشورهای افغانستان، تاجیکستان و ایران در تابستان سال جاری در شهر دوشبنه برگزار شود. آنان هم‌چنان به تفاهم رسیده‌اند که هفتمین نشست سران سه کشور در سال ۱۳۹۴ در شهر دوشنبه، پایتخت تاجیکستان برگزار شود.