د ننګرهار هسکې مېنې ولسوالۍ اړوند« ګورګورۍ» سیمې ته د تلوونکو سیلانیانو لپاره د ځوانانو یوې ډلې د میلمه پالنې ځانګړی دود په لاره اچولی، شین چای ورکوي او د دمې لپاره یې مناسب ځای چمتو کړی.
ځوانانو دا نوښت د شینوارو ښایسته سیمو ته د سیلانیانو د پام اړولو لپاره کړی دی.
د شینوارو ولسوالۍ د اصلاحي ټولنې یو غړي شین ګل شینواري اطلاعات روز ورځپاڼې ته وویل، په تیرو کلونو کې خلکو د جګړو له امله زړه نه ښه کوه چې د هسکې مینې ولسوالۍ ته د تفریح په موخه راشي، خو په خبره یې اوس د ډاډمن امنیت په راتګ سره یې سیلانیانو ته د تفریح او دمې لپاره مناسب ځای چمتو کړی.
شینواری زیاتوي: «کوم خلک چې د هسکې مېنې ولسوالۍ ته د تفریح په موخه راځي نو دلته ورته د شینوارو اصلاحي ټولنې په نامه د ځوانانو یوې ډلې په خپل شخصي لګښت سیلانیانو ته د شین چای او ورسره د ګوړې او نورو خوږو میوو تیاری نیولی او دا هر څه په مفت ډول سیلانیان ته ورکول کیږي.
اوسمهال د هسکې مېنې زیاتره سیمې چې تیر کال په کې جګړې وې اوس امن شوي او خلکو یې لیدو ته مخه کړې ده او کوم خلک چې راشي مونږ هم ورسره همکاري کوو، چې راشي او دلته ورته تاریخي سیمې هم ور وښایو او همدارنګه له شینوارو له کلتور سره هم اشنا شي.»
نوموړی وایي، له یاد کار څخه يې موخه د میلمه پالنې دود ژوندي ساتل او د یادې ولسوالۍ تفریحي سیمو ته د سیلانیانو پام ور اړول دي.
شین ګل زیاتوي:« زمونږ هدف شینوارو ولسوالۍ تفریحي سیمو ته د سیلانیانو پام اړول او همدارنګه د میلمه پالنې د دود ژوندي ساتل دي، چې خلک راشی او دلته هم تفریح وکړي او هم له شینواري کلتور سره اشنا شي.»
په ورته وخت کې ځايي اوسېدونکی عادل شینواری بیا په ملي سوداګرو غږ کوي، چې د هسکې مینې ولسوالۍ په تفریحي ځایونو کې دې پانګونه وکړي.
عادل زیاتوي:«هسکه مېنه کې ډیر ښه دتفریح ځایونه شته او که چیرې پکې هوټلونه او دوکانونه جوړ شي او سوداګر پکې پانګونه وکړي نو ډیر به ښه شي هم به خلکو ته ګټه ورسیږي او هم به کوم خلک چې له دغه سیمو لیدنه کوي، یو مناسب ځای به ورته برابرشي، نو غوښتنه کوو چې په هسکه مېنه کې دې باید سوداګر د هوټلونو په جوړولو کې پانګونه وکړي.»
بل لور ته فرهنګيان هم له کلتوري اړخه د یادو ځوانانو هڅې ستایي.
لیکوال او ژورنالېست محمد اصف شینواري اطلاعات روز ورځپاڼې ته وویل، هیله مند دی، چې د سیلانیانو په ورتګ سره به د یادې ولسوالۍ د اوسیدونکو اقتصاد لا پیاوړی او ورسره د ځایي خلکو ژوند ښه شي.
شینواري زیاته کړه:«له فرهنګي اړخه هم د یادو ځوانانو کار د ستایلو دی او له اقتصادي پلوه هم یادې ولسوالۍ ته دسیلانیانو تګ راتګ کولای شي د خلکو په اقتصادي وده کې مهم رول ولري، چې په دې سره به نه یوازې خلکو ته د کار زمینه برابره شي بلکې خلک به هم له تاریخي ځایونو لیدنه وکړي.»
په همدې حال کې دننګرهار د اطلاعات او فرهنګ ریاست چارواکي هم وایي، چې د تیرو کلونو په پرتله سږکال ننګرهار ته د کورنیو سیلانیانو تګ راتګ زیات شوی.
هسکه مېنه د شینوارو ولسوالۍ یو له شنو او سرسبزه ولسوالیو ده، چې غرونه په طبیعي ځنګلونو پوښل شوي او د تفریح لپاره مناسب ځای شمیرل کیږي.