اطلاعات روز: ارزګان کې خلک د توکو له لوړو بیو شکايت کوي او وایي، چې په تيره يوه اونۍ کې د ټولو توکو نرخونه لوړ شوي چې دوی یې د پیرلو وس نه لري.
طالبانو د روانې اوونۍ په پېل کې د ارزګان په مرکز ترينکوټ او ولسواليو کې د پاکستانۍ کالدارو پر راکړه ورکړه بنديز ولګوه چې ورسره يو شمير هټۍ والو د توکو نرخونه لوړ کړي دي.
د دې ولايت يو اوسيدونکی محمدشفيق وايي، چې د پاکستانۍ کالدارو په بنديدو سره يو شمير هټۍوالو پر خپل سر نږدې د ټولو توکو نرخونه لوړ کړي دي.
نوموړي وويل: «کله چې په ارزکان ولايت کې کالدارې بندې شوي هټۍوال بده استفاده کوي غوښتنه مو له طالبانو څخه دا ده چې باید د دغه ډول کسانو مخه ونيسي او سخته سزا ورکول شي.»
د حميدالله په نامه یو بل کس بیا صرافان او هټۍوال دواړه د توکو د نرخونو په لوړیدو کې ملامت بولي. دی وایي: «کله چې په بازار کې موږ توکي اخلو پخوا چې په ۱۰۰ کالدارې وو، اوس هغه پر موږ په ۴۵ افغانۍ باندې پلوري دا ډير زيات توپیر لري.»
خلک د طالبانو له حکومت غوښتنه کوي چې د دوی اقتصادي ستونزو ته په کتو دې نرخونه کنټرول کړي.
ورته مهال ارزګان کې د طالبانو د اطلاعاتو او کلتور ريیس اغاولي قريشي وايي، چې دوی د خلکو له شکايتونو خبر دي او زياتوي چې هغه کسانو ته به سزا ورکړي چې په خود سره ډول يې د توکو نرخونه لوړ کړي دي.
نوموړي خلکو ته ډاډ ورکوي چې د يوه کمیسيون په مرسته به په ښار کې نرخونه کنټرول کړي.
قریشي وویل:«د نرخونو د کنټرول په برخه کې يو پلان باندې کار روان دی تراوسه بشپړ شوی نه دی کله چې دغه پلان بشپړ شي دغه ستونزه به حل شي.»