اطلاعات روز: د لوګر ولایت په مرکز پُل عالم کې یو ځوان ۷۰۰ زده کوونکو ته د عصري زده کړو یو کلن ښوونیز پروګرام پېل کړی دی.
د محمد اکبر اتل په نوم د لوګر ولایت اوسېدونکي د زده کړو دوه مرکزونه د پُل عالم اړوند «غیرت اباد» او «بیدک» سیمو کې جوړ کړي، چې ۷۰۰ بې وزله زده کوونکو ته یې د عصري زده کړو زمینه برابره کړې ده.
د لوګر ولایت لپاره د طالبانو د پوهنې ریاست مسوولین وايي، دغو کورسونو کې د یو کال لپاره په وړیا ډول زده کوونکو ته د انګلیسي، کمپیوټر، ریاضي او ځینې نور مضامین تدرسیږي او په خبره یې چې د مسلکي ښوونکو له لوري یې درسي بهیر پر مخ وړل کیږي.
دوی زیاتوي چې دا کورس له پوهنې ریاست سره هم ثبت شوی او پکې زده کوونکو ته قرطاسیه او نور درسي مواد هم ورکول کیږي.
په همدې حال کې بیا د لوګر ولایت اوسېدونکي اړمنو زده کوونکو ته د زده کړو اسانتیا برابرېدل مهم ګام بولي او غوښتنه کوي چې ورته چاره دې په نورو سیمو کې هم په لاره واچول شي.
دوی همدا راز له پوهنې ریاست هم په دې برخه کې د ځانګړې پاملرنې غوښتونکي دي او په وینا یې چې د لوګر ولایت په لېرې پرتو سیمو او ولسوالیو کې زیاتره ماشومان د اقتصادي ستونزو له امله عصري زده کړو ته لاسرسی نه لري.
لوګر د هیواد له هغو ولایتونو ګڼل کیږي چې په تېرو دوو لسیزو کې یې ځینې ولسوالۍ د جګړو له امله د نورو برخو ترڅنګ په پوهنې ډګر کې هم له پامه غورځول شوې وې او واک ته د طالبانو له رسېدو تر اوسه یې هم شته ستونزو او اړتیاوو ته رسېدنه نه ده شوې.
د پوهنيز چاپیریال نه موجودیت، ښوونځیو کې د درسي کتابونو او مسلکي ښوونکو کموالی او ځینې نور هغه لاملونه بلل کیږي چې د لوګري ماشومانو د زده کړو بهیر یې ټکنی کړی دی.
