اطلاعات روز: ننګرهار کې ځايي سرچینې وایي چې «ناپېژانده کسانو» د پخواني حکومت یو څارنوال او د هغه خور د کابل – ننګرهار پر لویه لار لومړی مسموم کړي او بیا يې په مرموز ډول وژلي دي.
سرچینه زياتوي، دا څارنوال نقي محمد تقي نومېده او وړمه ورځ (دوشنبه، ۲۹ د لړم) د ده او خور جسدونه يې ځايي طالبانو د جلال اباد ښار د اتمې ناحیې په «دامان سیمه» کې موندلي.
سرچینه وايي، د یاد څارنوال او د هغه د خور پر بدن د شکنجې نښې لیدل هم لیدل شوې دي.
د سرچینې په وينا، دا پخوانی دولتي څارنوال څو ورځې وړاندې د یوې ټېلېفوني اړیکې په واسطه ننګرهار ته غوښتل شوی و او تر دې وروسته د کابل – جلال آباد پر لویه لار نادرکه شوی.
ښاغلي تقي په تېر حکومت کې د کابل د ختیځ زون په څارنوالۍ او د استیناف څارنوالۍ د جنايي څېړنو په ریاست کې دنده درلوده.
تر اوسه د دې څارنوال د وژنې انګېزه او عاملین معلوم نه دي او نه هم د ننګرهار ځایي طالبانو په دې تړاو رسنیو ته څه ویلي.
شاوخوا درې اونۍ وړاندې هم د ننګرهار په کامې ولسوالۍ کې د یوې کوچنۍ نجلۍ جسد چې په مرموز ډول وژل شوې وه موندل شوی و، مګر تر اوسه یې د وژنې انګېزه او عاملین نه دي معلوم شوي.
واک ته د طالبانو تر رسېدو وروسته د هېواد د نورو ولایتونو په څېر ننګرهار کې هم د مرموزو وژنو کچه تر بل هر وخت لوړه شوې چې خلک یې اندېښمن کړي.
