اطلاعات روز: په هيواد کې د طالبانو د مشر هبتالله اخوندزاده په امر هغو کسانو ته د عصري زده کړو د فراغت اسناد ورکول کېږي چې له ديني مدرسو څخه فارغ شوي وي.
دغو کسانو ته د اسنادو د ورکړې لپاره د طالبانو د لوړو زده کړو او پوهنې وزارتونو سربېره د دغې ډلې د جهادي مدرسو اړوند ولايتي رياستونه ازموينه اخلي.
دغه ازموينه چې نن د هیواد د نورو ولايتونو ترڅنګ په خوست کې هم واخیستل شوه، طالب مسوولينو ويلي، هغه کسان چې لومړنۍ ديني زده کړې يې کړې وي د دولسم ټولګي، د کوچنۍ دورې فارغانو ته د لوړو زده کړو لیسانس او په مدرسو کې له لويې دورې فارغ شويو کسانو ته له برياليتوب وروسته د ماسټرۍ اسناد ورکول کيږي.
د خوست پوهنې رياست په يوې خبرپاڼه کې ويلي، د يادو اسنادو ترلاسه کولو لپاره له ۲۰۰۰ ډېرو کسانو ازموینه واخیستل شوه، چې له ډلې یې د عالميه دورې ۷۲۷، عالیه ۶۳۳ او او خامسه دورې ۶۸۹ کسانو ګډون کړی.
هيواد کې بيا له عصري زده کړو فارغ ځوانان دا د زده کړو بنسټ د کمزوري کېدو لامل يادوي او وايي، طالبانو هغه ځوانان چې کلونه يې په عصري زده کړو کې د اسنادو ترلاسه کولو لپاره هڅی کړي له هغو سره برابر کړل چې يوازې په يوې ازموينې سره اسناد ترلاسه کوي.
د لوګر ولايت يو ښوونکي چې نه يې غوښتل نوم يې څرګند شي اطلاعات روز ته وويل، د ماسټري اسناد ترلاسه کول کومه اسانه موضوع نه ده، خو طالبان ورته دغه اسناد يوازې د يوې ازموينې په ورکولو سره ورکوي.
هغه وويل: «زه چې له دغې موضوع خبر شوم افسوس مې وکړ، ځکه يو چا چې هيڅ عصري زده کړې نه وي کړي څنګه ورته د ماسټرۍ اسناد ورکوي يا د پوهنتون لیسانس، نو دا خو ولاکه هيڅ معيار وي، هغه ځوانان به څه کوي چې ۱۶ يا ۲۰ کاله يې خواري او په ځان سختې تېرې کړې وي، مجبوره دي هيواد پرېږدي.»
په افغانستان د طالبانو له واکمېدو وروسته د دندې ترلاسه کولو لپاره زيات ارزښت په ديني زده کړو کې ترلاسه شويو اسنادو ته ورکول کېږي، چې له دې کبله ګڼ لوستي ځوانان بې روزګاره شوي، هيواد يې پرېيښی او زياته برخه لاهم د وتلو په هڅه کې دي.
