سرچینې وایي، د هغو ۱۳ طالب جنګیالیو جسدونه چې په بدخشان کې په وروستیو نښتو کې وژل شوي، په کندهار کې د ۲۰۵ قول اردو ته لېږدول شوي دي.
د سرچینو په وینا، په وژل شویو جنګیالیو کې شپږ تنه د هلمند، څلور تنه د ارزګان او درې تنه د غزني اوسېدونکي دي.
سرچینې وایي، دغه جسدونه د جمعې په ورځ، د زمري په ۲۳مه کندهار ته لېږدول شوي او ټاکل شوې چې خپلو اړوندو ولایتونو ته ولېږدول شي.
سرچینې زیاتوي چې وژل شوي کسان د طالبانو د دفاع وزارت د ځانګړو ځواکونو غړي وو او په بدخشان کې د تېرو څو ورځو په نښتو کې وژل شوي دي.
د سرچینو په وینا، د دغو کسانو کورنیو ته ویل شوي چې د خپلو خپلوانو د وژل کېدو معلومات له هیچا سره شریک نه کړي. سرچینې وایي، طالبانو د خپلو جنګیالیو کورنیو ته ویلي چې هغوی په ترافیکي پېښه کې وژل شوي دي.
په بدخشان کې طالبان له جمعهخان فاتح، چې د طالبانو ناراضي قوماندان بلل کېږي، سره په نښته کې ښکېل شوي دي.
دغه نښته د سېشنبې له ورځې د بدخشان په نُسي ولسوالۍ کې پیل شوې ده.
طالبانو دغه نښته تایید کړې، خو په اړه یې نور جزئیات نه دي ورکړي.
جمعهخان فاتح د دغې نښتې په اړه ویلي چې هغه د طالبانو له رژیم سره ستونزه نه لري، بلکې ستونزه یې د طالبانو له قطعاتو سره ده. نوموړي د طالبانو قطعات پر د ملکي وګړو په وژلو تورن کړي دي.
