په داسې حال کې چې افغان وګړي ایران ته د ویزې ترلاسه کولو پر مهال له محدودیتونو سره مخ دي او دغه ویزې په تور بازار کې په لوړه بیه پلورل کېږي، د ایران د بهرنیو چارو وزیر عباس عراقچي ویلي چې د افغان وګړو لپاره د ویزو د صادرولو په برخه کې هېڅ خنډ نشته.
د ایرنا خبري اژانس د راپور له مخې، عراقچي د شنبې په ورځ (۲۴ د زمری) د ایران د رضوي خراسان ولایت د ګرځندوی او لاسي صنایعو د پانګهوالو په تخصصي غونډه کې ویلي: «د بهرنیو چارو وزارت د افغانستان اتباعو ته د ویزو د صادرولو په برخه کې کوم خنډ نه لري او چمتو دی چې د واقعي غوښتونکو، په ځانګړي ډول د روغتیايي ګرځندویانو لپاره د ویزې د صادرولو بهیر اسانه کړي.»
عراقچي ویلي چې د روغتیايي ګرځندوی د غوښتونکو لپاره باید ځانګړي سیستمونه او مشخصې پروسې جوړې شي، څو واجد شرایط کسان وکولای شي په لا ډېرې اسانۍ ایران ته داخل شي.
افغان وګړي ایران ته د کار موندنې ترڅنګ د درملنې لپاره هم سفر کوي.
په تېرو وختونو کې په افغانستان کې د ایران سیاسي استازولیو افغان وګړو ته سیاحتي ویزې ورکولې، خو له تېر کال راهیسې یوازې کاري ویزې ورکوي. کاري ویزې هم محدودې دي او ترلاسه کول یې له ګڼو ستونزو سره مخ دي.
له دې سره سره، د ایران ویزې په تور بازار کې تر دوه زره ډالرو پورې پلورل کېږي. هغه افغان وګړي چې د ویزې ترلاسه کولو توان نه لري، د قاچاقي لارو سفر غوره کوي؛ هغه مرګونی مسیر چې ځینې کډوال یې تر منزل پورې نه رسېږي.
په دې وروستیو کې د افغانستان د کار غوښتونکو ۱۹ کسیزه ډله د ایران پر لور د نیمروز په دښتو کې ورکه شوه او ټول غړي یې د تندې او لوږې له امله مړه شول.
