د آلمان حکومت ۱۳ افغان اتباع، چې د بېلابېلو جرمونو له امله محکوم شوي وو، کابل ته شړلي دي.
د آلمان «اِنټيوي» شبکې راپور ورکړی، چې دغه کسان د سهشنبې په ورځ (د وږي ۲۴مه) په یوه چارټر الوتکه کې کابل ته انتقال شوي دي.
دغه رسنۍ د آلمان د فدرالي کورنیو چارو وزارت په حواله لیکلي، چې ټول ایستل شوي کسان نارینه دي او له استثنا پرته هغه کسان دي چې مخکې د جنسي جرمونو، فزیکي تاوتریخوالي او نشهیي توکو د قاچاق په جرمونو محکوم شوي وو.
د آلمان حکومت له ۲۰۲۴ کال راهیسې افغانستان ته د افغان اتباعو د شړلو لړۍ پیل کړې ده.
د طالبانو له ډلې سره له رسمي تعامل وروسته، چې په برلین کې د افغانستان په سفارت او په بن کې د هېواد په قونسلګرۍ کې د طالبانو د دوو ډیپلوماتانو د منلو لامل شو، آلمان افغانستان ته د اخراجونو لړۍ زیاته کړې ده.
تر اوسه ۲۶۳ کډوال له آلمان څخه ایستل شوي، چې ډېری یې د جنسي جرمونو، وژنې، تاوتریخوالي او نشهیي توکو اړوند جرمونو له امله محکوم شوي کسان دي.
په آلمان کې د کډوالو د ملاتړ یوې ادارې ویلي، چې د ۲۰۲۵ کال تر پایه شاوخوا ۱۳ زره افغان اتباع په آلمان کې د دغه هېواد د پرېښودو مکلف وو. د شاوخوا ۱۰ زره کسانو د استوګنې وضعیت «دولدونګ» یا «موقتي او مشروط زغم» و.
دا اصطلاح دې ته اشاره کوي چې اوس مهال د دغو کسانو د ایستلو امکان نشته؛ خو که دوی له قانون څخه سرغړونه وکړي او یا د آلمان له پولو ووځي، حکومت ته د هغوی د ایستلو قانوني زمینه برابرېږي.
