په افغانستان کې د بشري حقونو د سرغړونو په اړه د یوناما د بشري حقونو برخې په خپل تازه راپور کې ویلي، چې د طالبانو چارواکي لا هم په ښکاره له ښځو غواړي چې «په کورونو کې پاتې شي، د خپلو مېړونو اطاعت وکړي او د هغوی خدمت وکړي.»
په راپور کې راغلي، چې د بېلګې په توګه، د طالبانو د حج او اوقافو وزارت د روان میلادي کال د اګست پر شپږمه د جمعې د لمانځه په خطبه کې ویلي وو: «ښځې باید د خپلو مېړونو اطاعت وکړي، په کورونو کې پاتې شي، د مېړونو له اجازې پرته له کوره ونه وځي او د ښځو له لوري د خپلو مېړونو خدمت په اسلام کې لازمي وجیبه ده.»
د راپور له مخې، د روان میلادي کال د اګست پر ۱۶مه د طالبانو د عدلیې وزارت هم په اېکس ټولنیزه شبکه کې د «واعظانو نصاب» خپور کړی و، چې پکې راغلي وو: «مېړه د ښځې حاکم دی او ښځه مکلفه ده چې خپل مېړه خوشحاله وساتي.»
یوناما ویلي، چې په دغه نصاب کې واعظانو ته دا دنده هم سپارل شوې، چې «نارینهوو ته امر وکړي څو خپلې تر سرپرستۍ لاندې ښځې اړې کړي چې له نامحرمو سره د مخامخ کېدو پر مهال حجاب مراعت کړي.»
طالبانو پر افغانستان له بیا واکمنېدو راهیسې په ټولنه کې د ښځو پر حضور او فعالیتونو پراخ محدودیتونه لګولي دي.
دغه ډله د ښځو د ټول بدن پټول «لازمي» بولي، د ښځو غږ «عورت» ګڼي او له کوره بهر د هغوی د غږ اورېدل حرام بولي.
