د امریکا د تابعیت او کډوالۍ ادارې اعلان کړی، چې د دغه هېواد د عدلیې وزارت په همکارۍ یې د ۴۰ کسانو د تابعیت لغوه کولو لپاره قضیې جوړې کړې دي، چې دوه افغانان هم پکې شامل دي.
د امریکا د عدلیې وزارت په وېبپاڼه کې د خپرې شوې اعلامیې له مخې، دغه کسان پر درنو جرمونو تورن دي، چې په کې د یوه بهرني دولت د اجنټ په توګه فعالیت، د هویت جعل، غیرعمدي وژنه او له ځانګړي وضعیت لرونکي یوه سړي سره په تاوتریخوالي مل جنسي تېری شامل دي.
په اعلامیه کې د هغو دوو افغانانو نومونه وارثجان صافي، ۵۵ کلن، او اسدجان رامین، ۵۷ کلن، ښودل شوي چې د تابعیت د لغوه کېدو له ګواښ سره مخ دي.
د امریکا د تابعیت او کډوالۍ ادارې ویلي، چې د وارثجان صافي، چې د «طارق محمود» په نوم هم پېژندل کېږي، پر ضد یې د نیویارک د ختیځې ناحیې په سیمهییزه محکمه کې شکایت ثبت کړی دی.
د دغې ادارې په وینا، د شکایت موخه د وارثجان صافي د تابعیت لغوه کول دي؛ ځکه هغه د امریکا تابعیت په ناقانونه توګه ترلاسه کړی او د تابعیت اخیستو په بهیر کې یې په قصدي ډول د امریکا د تابعیت او کډوالۍ ادارې ته مهم حقایق تحریف کړي یا پټ کړي دي.
د امریکا د تابعیت او کډوالۍ ادارې د اعلامیې له مخې، صافي په ۱۹۹۵ کال کې د پاکستان له جعلي پاسپورټ او د «طارق محمود» له نوم څخه په استفادې امریکا ته داخل شوی و. د هویت تر افشا کېدو وروسته یې اعتراف کړی و، چې د افغانستان تبعه دی. له دې وروسته د هغه د ایستلو قانوني بهیر پیل شو او په همدې کال کې د کډوالۍ یوه قاضي له امریکا څخه د هغه د ایستلو حکم صادر کړ.
د امریکا د تابعیت او کډوالۍ ادارې زیاته کړې، چې صافي د قاضي د حکم له منلو او له امریکا څخه د وتلو پر ځای، ځان ته نوی هویت جوړ کړ، له یوې امریکایۍ تبعه سره یې واده وکړ او د دې واده له لارې یې د قانوني دایمي استوګنې وضعیت ترلاسه کړ.
د دغې ادارې په وینا، صافي د تابعیت اخیستو په مرکه کې، سره له دې چې لوړه یې کړې وه، د خپلو بېلابېلو هویتونو، د کډوالۍ د امتیازاتو د ترلاسه کولو لپاره د هممهاله غوښتنلیکونو او نورو ناقانونه کړنو په اړه یې څه نه وو ویلي؛ هغه کړنې چې د تابعیت د ترلاسه کولو مخه نیسي.
د امریکا د تابعیت او کډوالۍ ادارې ویلي، چې د اسدجان رامین د تابعیت د لغوه کولو لپاره یې هم د پنسلوانیا ایالت د ختیځې ناحیې په سیمهییزه محکمه کې شکایت ثبت کړی دی. د ادارې په وینا، رامین نږدې ۳۰ کاله د هویت په جعل کې ښکېل و.
ادارې ویلي، چې رامین د «احمدشاه کوهستاني» په نوم د یوه کس په توګه ځان معرفي کړی و او په دې توګه یې د کډوالۍ ګڼ امتیازونه ترلاسه کړي وو، چې په پایله کې یې د امریکا تابعیت هم ترلاسه کړی و.
د اعلامیې له مخې، هغه د تابعیت اخیستو په بهیر کې خپل نوم له «احمدشاه کوهستاني» څخه «اسدجان رامین» ته بدل کړ؛ په داسې حال کې چې اصلي نوم یې له پیله اسدجان رامین و او هېڅکله احمدشاه کوهستاني نه و.
د امریکا د تابعیت او کډوالۍ ادارې ویلي، چې رامین د افغانستان د یوه بل تبعه هویت د هغه له خبرتیا او رضایت پرته غلا کړی و.
د دغې ادارې په خپاره کړي نوملړ کې د ایران، پاکستان، هند، فلیپین، مکسیکو، انګلستان، وینزویلا او کیوبا په ګډون د بېلابېلو هېوادونو د وګړو نومونه هم شامل دي.
ادارې ویلي، د امریکا د کډوالۍ او تابعیت قانون له مخې، که د یوه کس تابعیت په ناقانونه توګه یا د مهمو حقایقو په پټولو او دروغ ویلو ترلاسه شوی وي، نو د هغه تابعیت لغوه کېدای شي او د تابعیت سند یې باطلېدای شي.
د امریکا د تابعیت او کډوالۍ ادارې دغه اقدام د ډونالډ ټرمپ د حکومت پر مهال په یوه وخت کې د تابعیت د لغوه کولو تر ټولو لوی اقدام بللی دی.
