د روسیې ولسمشر ولادیمیر پوتین د امریکا د ولسمشر ځانګړي استازي سټیو ویتکاف سره په لیدنه کې ویلي، چې مسکو چمتو دی د روان میلادي کال په نومبر میاشت کې د اوکراین په اړه درېاړخیزې خبرې اترې بېرته پیل کړي.
سټیو ویتکاف د اوکراین له ولسمشر ولودیمیر زلنسکي سره تر لیدنې وروسته، چې په اوسلو کې یې کړې وه، نن د چهارشنبې په ورځ (د میزان ۲۹مه) روسیې ته ولاړ او په سنپترزبورګ ښار کې یې له پوتین سره ولیدل.
د روسیې د ولسمشر مرستیال یوري اوشاکوف خبریالانو ته ویلي، چې د اوکراین وضعیت د دې لیدنې اصلي موضوع وه او دواړو لورو د تلپاتې سولې ته د رسېدو پر لارو چارو خبرې وکړې.
د پوتین مرستیال زیاته کړې، چې ویتکاف نوموړي ته په اوسلو کې د اوکراین او اروپا د نوې تګلارې په اړه معلومات ورکړي دي.
هغه ویلي، چې د اوکراین د کړکېچ د حل په برخه کې د دغو وړاندیزونو عملي ګټه محدوده ده.
د سپوتنیک خبري اژانس د راپور له مخې، د پوتین او ویتکاف په خبرو اترو کې د روسیې د ولسمشر مرستیال یوري اوشاکوف او د پانګونې او اقتصادي همکاریو په چارو کې د روسیې د ولسمشر ځانګړي استازي کریل دمیتریف هم ګډون درلود.
دغه رسنۍ زیاته کړې، چې د امریکا د ولسمشر ډونالډ ټرمپ زوم جرد کوشنر هم د ویډیويي اړیکې له لارې په خبرو اترو کې ګډون کړی دی.
امریکا په وروستیو ورځو کې پر اوکراین د جګړې د پای ته رسولو لپاره خپلې هڅې یو ځل بیا پیل کړې دي. دا هڅې وروسته له هغې زیاتې شوې، چې پر اوکراین د ولسمشر ولودیمیر زلنسکي فشارونه ډېر شول.
یوه امریکايي چارواکي په اوسلو کې له زلنسکي او یو شمېر اروپايي چارواکو سره د ویتکاف لیدنه «رغنده» بللې ده؛ خو امریکايي چارواکو تر اوسه د ویتکاف او پوتین د لیدنې په اړه څه نه دي ویلي.
