په افغانستان کې د ملګرو ملتونو د مرستندویه پلاوي (یوناما) مشرې، رباب فاطمې، له کابله په خپل لومړي رسمي پیغام کې ویلي چې د افغانستان د خلکو وړتیاوې او هیلې د دغه هېواد له شته ستونزو څخه ډېرې لویې دي.
د یوناما مشره، چې تېره اوونۍ کابل ته رسېدلې، نن د شنبې په ورځ (د لړم په ۲مه) د ملګرو ملتونو د ورځې او د دغه سازمان د جوړېدو د ۸۱مې کلیزې په مناسبت یو ویډیويي پیغام خپور کړ.
رباب فاطمې په خپل پیغام کې ویلي: «د افغانستان پر وړاندې پرتې ستونزې د پام وړ دي؛ خو د دغه هېواد د خلکو استعدادونه، هیلې او وړتیاوې تر هغو هم ډېرې لویې دي.»
هغې زیاته کړې چې ملګري ملتونه لا هم د افغانستان د خلکو ملاتړ ته ژمن دي او د انساني کرامت د ساتنې، د غوره فرصتونو د برابرولو او د افغانستان د ټولو وګړو د ژوند د ښه کولو لپاره هڅې کوي.
رباب فاطمې ویلي چې په افغانستان کې یې خپل مسؤلیتونه د دغه هېواد خلکو او کلتور ته په ژور درناوي منلي دي او ژمنه یې کړې چې د خلکو خبرو ته به غوږ نیسي او له هغوی سره به تعامل کوي.
د یوناما مشرې ډاډ ورکړی چې ملګري ملتونه به د یوه «ژمن ملګري» په توګه پاتې شي، څو د افغانستان خلک وکولای شي خپل راتلونکی په خپله وټاکي.
افغانستان په ۱۹۴۶ کال کې، د ملګرو ملتونو له جوړېدو یو کال وروسته، د دغه سازمان غړیتوب ترلاسه کړ.
د ملګرو ملتونو سرمنشي، انتونیو ګوترېش، هم د دغه سازمان د جوړېدو د ۸۱مې کلیزې په مناسبت په یوه پیغام کې ویلي چې نړۍ نن تر بل هر وخت ډېر ملګرو ملتونو ته اړتیا لري.
هغه د ملګرو ملتونو پر بنسټیزو اصولو په ټینګار سره ویلي چې د ګډو موخو د ترلاسه کولو لپاره باید هېوادونه د وېش پر ځای خبرې اترې، د تقابل پر ځای همکاري او د وېرې پر ځای پیوستون غوره او پیاوړی کړي.
