د پاکستان د پوځ ویاند احمد شریف چودري وايي، اسلاماباد د ایران او امریکا ترمنځ د منځګړیتوب هڅو ته دوام ورکوي، خو هغه کړۍ چې د جګړې له دوام څخه ګټه ترلاسه کوي، د دواړو هېوادونو ترمنځ د هوکړې په لاره کې خنډونه جوړوي.
چودري د جمعې په ورځ (د لړم ۸مه) له رویټرز خبري اژانس سره په مرکه کې ویلي، پاکستان له پیاوړو خنډونو او هغو لورو سره سره چې د ایران او امریکا د جګړې دوام د خپلو ګټو لپاره بولي، د دواړو هېوادونو ترمنځ د کړکېچ د کمولو لپاره خپلو منځګړیتوب هڅو ته هیلهمن دی.
هغه د تهران او واشنګټن ترمنځ د منځګړیتوب هڅې «محتاطانه هیلهبښونکې» بللې او ویلي یې دي چې لا هم ځینې پیاوړې او مخالفې کړۍ شته چې د جګړې دوام د ځان په ګټه ګڼي.
د پاکستان د پوځ ویاند، پرته له دې چې د دغو کړیو نومونه واخلي، ویلي چې د خنډونو له شتون سره سره په خبرو اترو کې پرمختګ شوی دی.
چودري د پاکستان د پوځ د مشر عاصم منیر تهران ته د سفر په اړه ویلي: «که د عاصم منیر سفر د پرمختګ نښه نه وای، نو اړتیا نه وه چې نوموړی په یوه میاشت کې دوه ځله ایران ته سفر وکړي.»
د پاکستان د پوځ لوی درستیز عاصم منیر د تېرې اوونۍ د دوشنبې په ورځ د سعودي عربستان د دفاع وزیر خالد بن سلمان او د ترکیې د استخباراتو ادارې مشر ابراهیم کالین په ملتیا تهران ته سفر وکړ. د مکې د دفاعي تړون دې نظامي پلاوي په تهران کې د ډیپلوماټیکې لارې پر حل او د کړکېچ د لا زیاتېدو پر مخنیوي ټینګار وکړ.
پاکستان سربېره پر قطر هم د ایران او امریکا ترمنځ د غیرمستقیمو خبرو اترو له مهمو منځګړو څخه ګڼل کېږي. که څه هم تهران تېره اوونۍ د جګړې د پای ته رسولو لپاره د قطر وړاندیز رد کړی و، خو تېره شپه یو ځل بیا د قطر پلاوی ایران ته تللی دی.
تر اوسه د ایران او امریکا ترمنځ منځګړو په ښکاره توګه د هوکړې پر وړاندې د خنډونو په اړه جزئیات نه دي خپاره کړي.
د امریکا ولسمشر ډونالډ ټرمپ تر ډېره ایران د هوکړې د نه کېدو مسوول بولي او وايي چې تهران د یورانیمو له غني کولو لاس نه اخلي. خو ایراني چارواکي بیا اسرائیل د هوکړې پر وړاندې اصلي خنډ ګڼي.
د ایران د بهرنیو چارو وزیر عباس عراقچي تر دې مخکې ویلي وو: «د صهیونیستي رژیم له لوري د اسلاماباد د تفاهملیک د پلي کېدو مخالفت شوی او دغه رژیم د دې هوکړې تر ټولو لوی مخالف او خنډ دی.»
د ایران د بهرنیو چارو وزارت ویاند اسماعیل بقايي هم څو ځله په رسمي څرګندونو کې اسرائیل په سیمه کې د هوکړې د نه ترلاسه کېدو اصلي لامل بللی دی.
