د ایران د سپاه پاسداران سمندري ځواکونو اعلان کړی چې پرون (جمعه، د لړم ۸مه) د هرمز په تنګي کې څلور نفتي ټانکرونه له سمندري ماینونو سره تر لګېدو وروسته چاودېدلي دي.
د سپاه پاسداران سمندري ځواکونو په یوه خبرپاڼه کې ویلي، دوه نفتي ټانکرونه د سهار وختي او دوه نور ستر نفتي ټانکرونه، چې هر یوه یې له دوو میلیونو بشکه زیات خام تېل لېږدول، له غرمې وروسته له ماینونو سره لګېدلي دي.
د سپاه پاسداران په وینا، دغو بېړیو خپل د تګ راتګ او موقعیت معلومولو سیسټمونه بند کړي وو، له «غیرمجازې لارې» یې تګ کاوه او ورکړل شویو خبرداریو ته یې هم پام نه و کړی.
د عمان سمندري ځواکونو د یوې بېړۍ پېښه تایید کړې او ویلي یې دي چې د یوې بېړۍ ۲۵ کسیزه عمله یې له هغې وروسته ژغورلې چې د هرمز تنګي په سوېل کې، مسندم ته نږدې، پرې برید شوی او اور یې اخیستی و.
د عمان د سمندري امنیت مرکز ویلي، دغه بېړۍ د پاناما بیرغ درلود او له مسندم څخه په ۱.۶ سمندري میله واټن کې پرې برید شوی و.
بلخوا، د برېتانیا د سمندري سوداګرۍ د عملیاتو مرکز هم د فارس خلیج دننه د یوې بلې بېړۍ د چاودنې خبر ورکړی دی.
دغه مرکز په یوه خبرپاڼه کې ویلي، یوه بېړۍ د ایران د لاوان ټاپو په سوېل کې په ۴۰ سمندري میله واټن کې د یوه «نامعلوم توغندي» له لګېدو سره مخ شوې او اور یې اخیستی دی.
د برېتانیا د سمندري سوداګرۍ د عملیاتو مرکز ویلي، د دې بېړۍ عمله خوندي ده او تر اوسه د چاپېریالي زیانونو راپور نه دی ورکړل شوی.
د امریکا ولسمشر ډونالډ ټرمپ او نورو امریکايي چارواکو په وار وار د هرمز تنګي د کنټرول او واکمنۍ خبره کړې او ادعا یې کړې چې دغه سمندري لاره له ماینونو پاکه شوې او د بېړیو د تګ راتګ لپاره خوندي ده.
خو په سیمه کې د سمندري تګ راتګ څارونکي بنسټونه وايي، په تېرو درېیو میاشتو کې په هرمز تنګي کې د بېړیو پر وړاندې د نامعلومو توغندیو لګېدل او له سمندري ماینونو سره د بېړیو ټکرونه، د جګړې پر مهال د بېړیو د پېښو په پرتله ډېر شوي دي.
