د دایکنډي ولایت سرچینې وايي، د دغه ولایت د شهرستان ولسوالۍ یو سیمهییز مخور د شپې له خوا په خپل کور کې په مرموز ډول وژل شوی دی.
یوې سرچینې د «اطلاعات روز» ورځپاڼې ته ویلي، غلاممحمد د شهرستان ولسوالۍ د غوچان سیمې له سپینږیرو څخه و.
د سرچینې په وینا، غلاممحمد تېره شپه (جمعه، د عقرب ۸مه) په خپله کوټه کې د دوو مرمیو په ډزو وژل شوی دی. سرچینې زیاته کړې چې په دې ډزو کې د هغه د کورنۍ نورو غړو ته زیان نه دی رسېدلی.
بلې سرچینې ویلي، پر غلاممحمد د کوټې له کړکۍ ډزې شوې دي؛ هغه مهال چې نوموړی په لمانځه بوخت و.
تر اوسه د دغه سیمهییز مخور د وژنې انګېزه او عاملان نه دي روښانه شوي. په دایکنډي کې د طالبانو ځايي چارواکو هم د دې پېښې په اړه څه نه دي ویلي. د غلاممحمد جسد نن خاورو ته سپارل شوی دی.
یوه اوونۍ وړاندې هم د دایکنډي د خدیر ولسوالۍ د کیان په سیمه کې یو ځوان په مرموز ډول په ډزو وژل شوی و. دغه ځوان حسن خدایي نومېده او د شپې له خوا په خپل دوکان کې د ناپېژاندو کسانو له لوري وژل شوی و.
هره ورځ له بېلابېلو ولایتونو څخه د مرموزو وژنو او د مړو جسدونو د موندل کېدو راپورونه خپرېږي؛ دا په داسې حال کې ده چې طالبان په افغانستان کې د سراسري امنیت د ټینګښت ادعا کوي.
