«د افغانستان د آزادۍ جبهې» او «د افغانستان د ملي خپلواکۍ جبهې» دواړو ادعا کړې چې د پنجشنبې شپې په ۸:۳۰ بجو (د زمري ۱۵مه) یې د کابل هوايي ډګر پر پوځي برخه برید کړی دی.
«د افغانستان د آزادۍ جبهې» په یوه خپره کړې اعلامیه کې ویلي، چې د پنجشنبې ماښام شاوخوا ۸:۳۰ بجې یې د کابل پر هوايي ډګر برید کړی او د طالبانو پوځي تاسیساتو ته یې «درانه زیانونه» اړولي دي.
دې جبهې همداراز ادعا کړې چې په دغه برید کې د طالبانو یو شمېر غړي، چې کره شمېر یې نه دی معلوم، وژل شوي او ټپیان شوي دي.
په همدې حال کې، د «افغانستان د ملي خپلواکۍ جبهې» په نوم یوې بلې ډلې هم په همدې وخت او ځای کې د طالبانو پر ضد د برید مسؤلیت منلی دی.
دې جبهې په یوه اعلامیه کې ویلي: «د دې جبهې زړورو ځواکونو نن شپه په ۸:۳۰ بجو د کابل په هوايي ډګر کې د طالبانو د ترهګرې ډلې پر پوځي مواضعو راکټي برید ترسره کړ.»
«د افغانستان د ملي خپلواکۍ جبهې» زیاته کړې چې ځواکونو یې د کابل هوايي ډګر کې د طالبانو پر پوځي مواضعو څلور راکټونه توغولي، چې په پایله کې یې «له ۱۰ ډېر طالبان وژل شوي او لسګونه نور ټپیان شوي دي.»
خو دواړو جبههوو تر اوسه دا نه ده روښانه کړې، چې ایا په هممهاله توګه یې د کابل پر هوايي ډګر جلا جلا بریدونه کړي او که دواړو جبههوو د یوه برید مسؤلیت منلی دی.
