په پنجشېر کې سیمهییزې سرچینې وايي، د دغه ولایت د درې ولسوالۍ د عبداللهخېلو درې په غرنۍ سیمه کې د یوه ځوان جسد موندل شوی دی.
سرچینو اطلاعات روز ورځپاڼې ته ویلي، چې د دغه ځوان نوم «مشترى» و او نهه ورځې وړاندې د درې ولسوالۍ د منجنستو کلي څخه ورک شوی و.
د سرچینو په وینا، د تېرو نهو ورځو په ترڅ کې د دغه ځوان کورنۍ د هغه د موندلو لپاره لټون کړی، خو هېڅ درک یې نه و معلوم شوی.
طالبانو د پنجشېر په ځینو سیمو، په ځانګړي ډول د درې ولسوالۍ په غرنيو سیمو کې، غرونو ته د نارینهوو پر تګ راتګ محدودیتونه لګولي دي.
له همدې امله، پرون (شنبه، د لړم ۱۶مه) د کلي یو شمېر ښځې د دغه ځوان د ژوند او مرګ د څرک موندلو لپاره غره ته ختلې وې.
په پای کې دغو ښځو د منجنستو سیمې له غره څخه د دغه ځوان جسد موندلی دی.
د دغه ځوان نږدې سرچینې وايي، چې د نهو ورځو په تېرېدو سره د هغه جسد بدلون کړی او د غیرمسلکي لومړنیو کتنو پر مهال یې په بدن کې د جنایي پېښې څرګندې نښې نه دي لیدل شوې.
د مشترى خپلوان وايي، چې نوموړی بېکاره و او له هېچا سره یې شخصي دښمني هم نه لرله.
په پنجشېر کې د طالبانو سیمهییزو چارواکو تر اوسه د دې پېښې په اړه څه نه دي ویلي.
