د خوست سیمه ییز مسوولان وایي، چې د دغه ولایت د مرکز اړوند «د دولس سوه فامیلیو» په سیمه کې د یوه ترکي سوداګر له لوري د یو میلیون امریکايي ډالرو په مالي مرسته د «البدر» په نوم ۵۰ بستریز روغتون جوړ او ګټې اخیستنې ته وسپارل شو.
د خوست ولایت مقام څخه نن (دوشنبه، ۲۶ د زمري) په خپره شوې خبرپاڼه کې ویل شوي، دغه روغتون د «البدر خیریه بنسټ» له لوري په درې جریبه ځمکه کې جوړ شوی، چې له نسايي ولادي برخو سربېره په اوو بېلابېلو څانګو کې به ناروغانو ته په پنځوس سلنه تخفیف روغتیايي خدمتونه وړاندې کوي.
د خبرپاڼې له مخې، په دغه روغتون کې به د نورو شخصي روغتونونو په پرتله روغتیايي خدمتونه په ۵۰ سلنه تخفیف وړاندې کېږي او له ناروغانو څخه ترلاسه کېدونکې ۵۰ سلنه پیسې به بېرته د روغتون د چارو لپاره ولګول شي.
بلخوا، د طالبانو د کورنیو چارو وزیر خلیفه سراجالدین حقاني د جوړ شوي روغتون د پرانیستې مراسمو کې له روغتیايي بنسټونو غوښتي، چې د خپلو خدمتونو کیفیت لوړ، روغتیايي مرکزونه پر ځان بسیا او په دې برخه کې د خلکو باور ترلاسه کړي.
حقاني زیاته کړې چې هڅه کوي په راتلونکي کې په دغه روغتون کې د ناروغانو درملنه په وړیا ډول ترسره شي.
خوست د هېواد یو له هغه ولایتونو څخه دی چې د زیاتره لیرې پرتو سېمو کې په روغتیایي مرکزونو کي ښځینه ډاکټرانې نشته، بلکي د کورنیو نارینه غړي ښځینه وو ته اجازه نه ورکوي چې نارینه ډاکټران د هغوی درملنه وکړي.
