د بنګلهدېش سیاستوال خلیل رحمان د «باور بېرته راګرځولو» تر شعار لاندې په رسمي ډول د ملګرو ملتونو د عمومي اسمبلۍ د ۸۱مې دورې مشري په غاړه واخیسته.
ښاغلي رحمان د سېشنبې په ورځ، د وږی په ۱۷مه، د امریکا په نیویارک ښار کې د ملګرو ملتونو په مرکزي دفتر کې د عمومي اسمبلۍ سمبولیکه څټکۍ د تېرې دورې له مشرې، انالېنا بربوک، څخه واخیسته.
خلیل رحمان د دندې د ترلاسه کولو پر مهال په نړۍ کې روانو جګړو، بشري بحرانونو او د اقلیمي بدلونونو د زیاتېدو په اشاره، د «ملګرو ملتونو د اصلاح او نوي کېدو» پر اړتیا ټینګار وکړ.
هغه وویل: «موږ باید ملګري ملتونه د راتلونکي لپاره چمتو کړو. موږ په داسې شرایطو کې یو چې له بېباورۍ سره مخ یو. اوس نور ۱۹۴۵ کال نه دی؛ دا د عمومي اسمبلۍ ۸۱مه دوره ده. نړۍ بدله شوې ده. ملګري ملتونه هم باید بدل شي او زه به په دې بهیر کې مرسته وکړم.»
هغه د دې دورې لپاره «د باور بېرته راګرځول او د بدلون مدیریت» شعار ټاکلی او ویلي یې دي چې د سولې ټینګښت او د شخړو د پای ته رسولو، د ۲۰۳۰ کال د دوامدار پرمختګ د موخو د پلي کېدو د چټکتیا، د اقلیمي بدلونونو پر وړاندې د مبارزې، د بشري حقونو او کډوالو د ملاتړ، د مصنوعي ځیرکتیا د مدیریت او د ملګرو ملتونو د جوړښت د اصلاح لپاره به هڅې وکړي.
انالېنا بربوک، چې د ملګرو ملتونو د عمومي اسمبلۍ د ۸۰مې دورې مشره وه، د خپلې دورې په وروستۍ غونډه کې د خلیل رحمان د دندې د سپارلو پر مهال وویل چې اوس تر بل هر وخت د ملګرو ملتونو شتون «مهم او اړین» دی.
بربوک وویل چې د ملګرو ملتونو په فعالیتونو کې نیمګړتیاوې شته، خو داسې هېڅ هېواد نشته چې له ملګرو ملتونو پرته به یې وضعیت ښه وي.
هغې زیاته کړه: «په داسې نړۍ کې چې له کرکې ډک مطالب شپږ برابره ډېر پام او کلیکونه ترلاسه کوي، د ملګرو ملتونو مثبتې لاستهراوړنې په اسانۍ له پامه غورځول کېږي او دا د دې سازمان له مهمو ننګونو څخه یوه ده.»
د ملګرو ملتونو سرمنشي انتونیو ګوترش هم د څو اړخیز نظام پر وړاندې د باور پر بېرته راګرځولو ټینګار وکړ.
هغه د ملګرو ملتونو د عمومي اسمبلۍ د ۸۰مې دورې په وروستۍ غونډه کې وویل چې په اوسني پړاو کې، چې «شخړې، نابرابرۍ او بېعدالتۍ د زیاتېدو په حال کې دي، بېساري تودوخه نوي ریکارډونه ثبتوي، مصنوعي ځیرکتیا نوې ننګونې رامنځته کوي او مالي واټنونه لا هم پر خپل ځای دي»، د ملګرو ملتونو د شتون اړتیا لا څرګنده شوې ده.
ګوټرش زیاته کړه چې «په څو اړخیز نظام کې د باور بېرته راګرځول هغه پرېکنده ننګونه ده چې د عملي کولو لپاره یې باید د ملګرو ملتونو له لارې د عمومي اسمبلۍ له نوي رییس سره ګډ کار وکړو.»
