د ملګرو ملتونو د نشهيي توکو او جرمونو پر وړاندې د مبارزې دفتر وايي، په افغانستان کې د کوکنارو د کښت د بدیل په توګه زعفران او ګلاب ترویجوي.
دغه سازمان نن، دوشنبه د وږي په ۲۳مه، په «ایکس» ټولنیزه شبکه کې په یوه خپاره کړي پیغام کې ویلي چې دا پروګرام اوس مهال د ایټالیا د حکومت په مالي ملاتړ په ننګرهار او هرات ولایتونو کې عملي کېږي.
د ملګرو ملتونو د نشهيي توکو او جرمونو پر وړاندې د مبارزې دفتر ویلي، د دغو ولایتونو د بزګرانو ترمنځ د کوکنارو د بدیل په توګه د ګلابو او زعفرانو کرکېله او پروسس ترویجېږي.
همدارنګه، بزګرانو ته د کرنې او مالدارۍ اړوند مهارتونه، لکه د وړیو اوبدل، د ورېښمو تولید اوبدل او د سبزیجاتو پروسس، هم ور زده کېږي.
په افغانستان کې د جمهوري نظام پر مهال د نشهيي توکو، په ځانګړي ډول د کوکنارو چې تریاک ترې تولیدېږي، کښت، تولید او قاچاق منع وو؛ خو د دولت له کنټرول څخه بهر سیمو او د طالبانو تر واک لاندې سیمو کې دغه فعالیتونه دوام درلودل.
طالبانو په ۲۰۲۲ کال کې، افغانستان ته له بیا واکمنېدو وروسته، اعلان وکړ چې د نشهيي توکو کښت، تولید او قاچاق منع دي.
ملګري ملتونه وايي، د طالبانو دغه فرمان په افغانستان کې د کوکنارو کښت تر ۹۵ سلنې پورې کم کړی دی؛ خو د بزګرانو لپاره د بدیلو عایداتي سرچینو نشتوالی او د نشهيي توکو د پلورونکو لپاره د دغو توکو لوړه ګټه لا هم د نشهيي توکو د کروندو د بشپړ له منځه وړلو پر وړاندې خنډونه دي.
